Kawei na ki lad ban pynsaphriang ia ka jingtip shaphang ka jinglong tynrai, ka kolshor, ka rukom im bad ki jait ktien, ka rukom synshar khadar, ka jinghiar pateng jong ka jylla, mynta ka sngi ka 23 tarik Naitung 2024, ka Khasi Hills Autonomous District Council (KHADC) ka la ïoh ban plie ia ka Library ha kaba u Lat ka jylla, u Phagu Chauhan u la long u kongsan.
Ha kane ka sngi la iadon ryngkat ruh da u CEM ka KHADC u Bah Pyniaid Sing Syiem , Dy CEM u Bah PN Syiem, ki EM ki nongtrei ka Council bad kiwei kiwei ha ka jingialang ba la pynlong ha KHADC .
Ha ka jingioh iakren nad u CEM ka KHADC u Bah Pyniaid Sing syiem, u la ong “kane ka long ka jingsah kynmaw ha ka history jong ka council namar ha ki 73 tylli ki snem naduh la ioh ia ka Autonomous District Council hapoh ka 6th Schedule jong ka article 2044 (ii) ha ka sien ba nyngkong ba u Lat ka jylla u la ioh ban iuh kjat hapoh ka Council. Ha kane ka library phin ioh ia ki jingthoh halor jingpyniaid dorbar kaba nyngkong tam naduh u snem 1952 ka ba la tip kum ka United khasi Jaintia Hills District Council, ka ba long ka spah jingtip ia ki ba mynta bad ia ki lawei”.
Nalor kata u la iathuh ruh ba ha kane ka Library yn ioh ia ka jinglum thup ia ki kot donkam ban ioh jingtip halor ka history jong ka jaitbynriew, ki kot jong ki Nongthoh kot ki ba la paw ha ka jylla bad ka kot ka ba la slem tam ruh ka ba dei naduh u snem 1854.
