U Myntri Rangbah ka jylla, u Conrad K. Sangma mynta ka sngi u la plie ia u maw nongrim ban tei ia ka Indigenous Cultural Centre kaba la kot sha ka 15 klur tyngka jong ka Seng Khasi Kmie kaba don ha Mawkhar, Shillong, East Khasi Hills.
Ha kane ka sngi ba plie ia u mawnongrim la iadonlang da u Symbud Myntri Rangbah ka Jylla u bah Prestone Tynsong, u Myntri ka tnad Arts and Culture, u Bah Paul Lyngdoh, ki dkhot ka Seng Khasi Kmie, ki Rangbah Shnong ki Khynnah skul ka Seng Khasi nalor kiwei kiwei.
Haba ai jingkren ha kane ka sngi, u Myntri Rangbah, u la ong ba ka jingtei ia kane ka Indigenous Culture Centre ka long kum shibynta ban pynneh pynsah ia ka riti ka dustur bad kumjuh ka jinglehniam khnang ban pynneh pynsah ia ka pateng ban wan.
Haba kren shaphang ka jingdonkam ban kyntiew bad pynneh pynsah ïa ki rukom im jong ngi, u la ong ba lada iakren shaphang ka jingpynneh pynsah ïa ka kolshor, ka rukom im, bad ka histori, ka jaitbynriew riewlum jong ka thaiñ shatei lammihngi ki long kiba kyrpang bad kiba iapher ha kiba bun ki liang.
U la ong ba lada ym shym la lah ban buh jingthoh ia ka histori, ia ka jingngeit bad ia ka kolshor, hynrei lyngba ka Chief Minister Research Fellowship (CMRF), ka Sorkar kan kyntiew ia ka jingwad bniah, khnang ba yn lah ban pynneh pynsah ia ka riti dustur bad ka histori.
Da kaba kyrmen ba kane ka centre kan long ka jaka ban ïoh jinghikai bad ban ïasam ïa ki jingtip, u la ong ba ka centre ka dei ban pyni ïa ka kolshor ba riewspah sha ka pyrthei, kumjuh ruh ban pynlah ïa ki samla ban ïoh jinghikai na ki rangbah, ki riewstad kiba lah ban ïasam ïa ka jingstad jong ki bad ki pateng ban wan.
Haba pynpaw ba ka ri India ka dei ka jaitbynriew kaba itynnad bad kaba bun jait, u la ong ba ka sorkar ka la ju kyrshan ïa ki jaidbynriew bapher bapher ban pynneh pynsah ïa ka pateng bad ka kolshor ba riewspah jong ki bad kum ka sorkar ka kwah ban pynthikna ba baroh ki jaidbynriew ha ka jylla kin lah ban roi, ban im ha ka jingïatylli, bad ban pyni ïa ka jingbun jait jong ki jaitbynriew.