Shi bynta na ka thong jong ka sorkar ban pynkiew ïa ki rukom seng kam seng jam na ka bynnta ki khun samla bad ïa ki longkmie kumjuh, na ka liang u Myntri Rangbah jong ka jylla u Conrad K. Sangma mynta ka sngi ula wan ban plie ïaka prokram ‘CM-Elevate’ da kaba sam ïa ki Cheque pisa na ka bynta ka YESS Meghalaya, ka SHGs bad ka Green Meghalaya.
Ïa kane ka prokram la pynlong ha District Library Auditorium Mynthong, Jowai ha ka jingdonlang u MLA ka Jowai ka thaiñ ma Wailadmiki Shylla, u MLA ma Lahkmen Rymbui, MLA kong Santa Mary Shylla, ki ophisar sorkar jong ki ar District West bad East Jaiñtia Hills nalor kiwei kiwei de.
U Myntri Rangbah ula ong na ka bynta ki SHGs tang hapoh ka Jaiñtia Hills kila don haduh kumba Hynriew hajar Phra spah ar phew khyndai tylli ki SHG kiba la dep seng bad ka jingsam ïa ki skim kala poi sha ka 75 klur tam ha kine ki san snem.
Sa kawei ka prokram ka long ka ‘YESS Meghalaya’ bad kane ka prokram kan ïarap shibun eh ïa ki khun samla ba kin sdang ïa kino kino ki kam kiba lah ban pynbha haka imlang ka sahlang lyngba ka jingkrshan jong ka sorkar bad ha ka juh ka por kan ïarap ïa ki samla ban lait na ki kam sniew ba bun jait, u Myntri Rangbah ula pynsngew kino kino ki Youth Club kiba apply ïa kane ka skim kin ïoh lad ban pynlong ïa kino kino ki prokram.
Kaba lai jong kane ka prokram ka dei ka Green Meghalaya bad kane ka long shi bynta ban pynneh pynsah ïa ka mei mariang, ula ong hapoh ka jylla ki don bun ki khlaw ba peit da ki shnong ki thaw kumta ka donkam bha ban ai jingïada ïa ki.
U ong ba ka jingkyrduh kam hapoh ka jylla ka jur bha ong u myntri rangbah namar katkum ka jingkhieñ ki don haduh 70 hajar ngut ki samla kiba kyrduh kam kyrduh jam haka shi snem bad katba nang ïaid ki snem kane ka dang kiew shuh shuh namar ka jingbun biew. Halor kane kum ka sorkar ba mynta kan ïaleh ban wad ki lad ki lynti na ka bynta ki samla da kaba pynmih ïa kum kine ki prokram.
Mynta ka sngi la sam ïa ki 37 tylli ki cheques hapoh ka Yess Meghalaya, Green Meghalaya bad ka SHG movement kaba la lot sha ka T.1.25 klut tyngka.
