Shi bynta na ka sngi pynneh pynsah mariang ne ka ‘World Environment Day’ naka liang ka Seiñ Raij Jowai lyngba ka Land Committee kala leh burom ïa kane ka sngi da kaba pynlong ïaka jingthung dieng haki bynta jong u ‘Lum Mookhai’ Dulong Jowai.
Hashwa ban thungdieng kala don ka jingïalang ba lyngkot, ha kaba ka Tourism Officer ka West Jaiñtia Hills, ka kong S.D Shylla kala long kum ka kongsan. Ïa ka jingïalang la pynïaid da u Dolloi ka Elaka Jowai, u Puramon Kynjing, katba u Pator ka Elaka Jowai, u Raymond Nartiang ula ai ki kyntien nguhblei.
La don lang da u President ka Seiñraij Jowai, u ma OH Toi uba la pynsngew ba ka jingleh burom ïa kane ka sngi ha kane ka jaka bala seng ïaka shnong Jowai da ki saw nguh shi para kata ka Bon, ka Teiñ, ka Wet bad ka Doh kiba la wan ha halor jong une u lum kumta ka long kaba donkam mynta ban pynneh pynsah ïa kane ka jaka.
Na ka liang ka kong S.D Shylla haba ai jingkren kala pynpaw ka jingkmen ban ïadon bynta lang ha kane ka sngi kynmaw burom ïaka World Environment Day. Kala pynsngew ba ka tnad Tourism mynta u snem kan thung haduh 4,000 tylli ki tynrai dieñ ha kylleiñ ka West Jaiñtia Hills.
Shuh shuh kala pynpaw ka jingsngewdiaw bad sngewlehraiñ halor ka jingmih khubor ki ñuit ha sor Jowai man ka por.
La pynkut ïa ka jingïalang da ki kyntien ai khublei na u Secretary ka Land Committee ma Lammat Oo Laloo, hadien kane la shim bynta lang ban thung ïa ki 300 tylli ki tynrai dieng ha katei ka jaka jong u Lum Mookhai.
