Kum ka dak jong ka jingburom bad ban pynsah nam ia la u jong u kpa u (Lt.) Dominic War bad ban kyntiew ia ka jingnang jingstad ia ki khynnah u MDC ka Mynsngat Khanduli Constituency u ma Dawan Lyngdoh ula plie ia ka ïing skul ba thymmai jong ka Dominic English School ha Shnong Namdong mynta ka sngi.
Ha kane ka Sngi la iadon lang u Principal ka Krist Syiem Sec. School Namdong Rev. Fr. Dominic Kympat, Waheh Chnong ka Namdong A&B ma D.S War bad ma Arki Sumer, u Secretary Shnong ma Shiningstar Thubru, ma Constantin Thubru, ma Chanbor War, kiba ha ïing u ma Dawan Lyngdoh bad kumjuh ka Headmistress ka School kong Queensina Suchiang, ki Nonghikai, ki khynnah Skul bad ki kmie ki kpa jong ki khynnah Skul.
U ma Dawan Lyngdoh haba kren mynta ka sngi ha ka jingialang plie ia katei ka ïingskul u pynpaw ia ka kmen ban pynurlong ia ka jingangnud ka jong u ban pynsah ia ka nam bad ka burom jong u kpa la jong bad da ka jingbuh ia kane ka School kan lah ban iarap ia ki khynnah pule kiba wan na ka long ïing ba duna ka jingioh hapoh katei ka thaiñ.
U la ong ba ka jingdon ka school kam shym la mut ban shim kabu ban leh bussines hynrei ban iarap kat ba lah ban ai jingshakri ia ki ba duk ba shitom lyngba kane ka School. Ha kaba iadei bad ka bai School u ma Dawa u la ong ba ki kmie ki kpa ki lah ban ai kat kaba ki sngewbit, lait noh ki kot pule bad ki uniform ki hap hi ban thied.
Ia kane school la sdang naduh 2021, ha i ïing wai ba shipor. Kane ka School ka don 4 tylli ki kamra ia mynta bad ka don haduh ka Class V (Five). Mynta u snem pat la ioh ban kynriah sha ka Building lajong. Ia baroh ki jinglut jingsep ha kaba tei ia kane ka School la bei hi da u ma Dawan Lyngdoh MDC.
