Katba ki sngi ki dang tyllun hapoh ka jingsynshar jong ka Sorkar MDA 2.0 da ka jingialam jong u Myntri Rangbah Conrad K. Sangma, ki kam pynroi ruh ki la nang tuid na ka sngi sha ka sngi ha kaba la pynshisha ruh mynta ka sngi ka 25 Kyllalyngkot 2025, la plie paidbah ia ka Block office jong ka Mawhati C&RD Block kaba hap ha Ri-Bhoi District da u Myntri Rangbah Conrad K. Sangma.
Ha kane ka sngi ba la plie pyrda, la don ryngkat da u Myntri ba khmih ia ka tnad Community and Rural Development, u Taher Mondal, u MLA ka Mawhati Constituency Bah Charles Marngar, u MLA ka Umsning Bah Celestine Lyngdoh, u DC ka Ri- Bhoi District, u Abhilash Baranwal, IAS bad kiwei kiwei.
Da ka jingkmen u Conrad u la pynpaw ban ioh ia ka kabu ban pyllait paidbah ia kane ka Block ba thymmai kaba long ruh ka jingsuk bad ka jingmyntoi ia ki paidbah ka Ri-Bhoi. U la ong ba hadien ka jingap bad jingkhmih lynti kaba slem la pynurlong ia ka jingangnud jong ki nongshong Shnong kane ka thaiñ. “Kane ka thong kam dei kata ka jingleh ban wanrah ia ka jingsynshar kaba pynjan ia ki paidbah bad ngi hynrei ban pynbha bad pyntbit na ka bynta ki briew jong kane ka jaka” ong u Myntri Rangbah”.
Haba kren shaphang ka jingmyntoi na ka bynta ka jingwanrah ia ka block ba thymmai, u Myntri Rangbah u la ong ba ki briew jong kane ka thaiñ ki hap ban iaid palat 100 KM sha Umsning Block na ka bynta kano ka skhim ne kano kano ka bynta kaba iadei bad ka bhah na ka sorkar. Shuh shuh u la ong “namar ka jingiohi ia ka jingeh jong ki paidbah, ka sorkar ka la kut jingmut ban pyntreikam bad ia kata la pynurlong mynta ka sngi”.
U Conrad u la pyntip ruh ba baroh ki block ha Meghalaya la dep ban kyntiew kyrdan bad la don ruh kiba la sdang naduh ka por ba dang don lang bad ka Assam bad kiba khlem pynim shuh ne don ba leh ei ei.
Nalor kata, u Myntri Rangbah u la ong ruh ba kane ka thaiñ kan long ruh ka jingmyntoi bad ka jingkhang na ka bynta ka ioh ka kot ha kine ki sngi ban wan, kata da ka jingpyniasnoh ia ka surok lyngba ka Umsning-Mawhati sha Jagi, Assam. U la kyrpad ruh ia ki paidbah ba kin ïatreilang lang bad ka Sorkar na ka bynta ban pynroi shakhmat ia ka kam khamtam sha ki jaka khapud.
Ha kane ka sngi, la sam ruh ia ki M-Tabs lane ki kor ia kiba la tip kum ki Digital Learning Kits sha ki samla pule jong kane ka thaiñ.
