Ka jylla Meghalaya mynta u snem kan sa ioh ban pdiang (host) ia ka lympung Indian Super League (ISL) ha madan Jawaharlal Nehru Stadium Polo Shillong, da ka jingmynjur jong ka All India Football Federation (AIFF), kata ban pynlong ia 3 tylli ki jingialehkai na ka bynta ka Northeast United FC ha madan Jawaharlal Nehru Stadium, Polo Shillong.
Ban pynkhreh bad pyntikna ia ka jingpaka ka madan nadong shadong na ka bynta ban pynlong ia kitei ki jingialehkai, u Dr. Vijay Kumar D, IAS uba dei ruh u Commissioner bad Secretary jong ka tnad Sports and Youth Affairs ka Sorkar Jylla u la leit ban hiar hi da lade ryngkat bad ka kynhun ban leit sakhi ia ka jingpynkhreh, ka jingmaramot bad ka jingpynbiang ia ki jaka shong, jaka khreh ki nongialehkai bad kiwei kiwei.
Ha kane ka jingwan jong u, la lap ba bun ki kam ki dang sahkut, bad u la ioh ruh ban iakren bad u kontraktor ha kaba u la ai jingmut ruh ba dei ban pyndep hashwa ka 7 Tarik Rymphang 2025 kaba dei ruh ka jingialehkai ba nyngkong jong ka North East.
Kum ban shu pynkynmaw, ka jylla san sa ioh ruh ia ka kabu ban pdiang katto katne ki jingialehkai International, kaba dei ruh ka sien ba nyngkong ba ka kynhun ialehkai phutbol ka India kan sa ïalehkai ha kane ka Jylla.