Ki Nonghikai SSA ki ba don hapoh ka Lama jong ka Meghalaya SSA School Association (MSSASA) ha ka 28 Tarik Risaw 2024 ki la leit ban iakynduh ia u Myntri Rangbah ka Jylla, u Conrad K. Sangma ha Tura na ka bynta ban buddien halor ka jingdawa ban pynskhem kam ia ki nonghikai SSA ha ka jylla.
Haba kren sha ki ladpatahi khubor, u Bah Aristotle Rymbai u President ka MSSASA, u la iathuh ba kane ka jingiakynduh ia u Myntri Rangbah ka Jylla ka long ban pynpaw ka jingkhublei halor ka jingai jingmynjur ka Cabinet ban pynjlan ia ka rta thep kam ki nonghiakai SSA kaba la pynjlan na ka 37 sha ka 45 snem ka rta.
“Kane ka rai jong ka Sorkar Jylla, ka long ka jingplie lad ia ki nonghikai SSA ban ioh ban apply kam nonghikai ha ki skul sorkar, na ka bynta ki Upper Primary ka Lower Primary, ka Secondary bad ka Higher Secondary School” ong u Bah Rymbai.
Shuh shuh u la bynrap “Ha kane ka jingiakynduh la ioh ruh ban iakren halor ka mat ba ka sorkar ka la pynkreh ban shim na ka bynta ki nonghikai SSA khamtam halor ban wanrah ia ka policy ka ba long ka jingpynskhem kam ia ki nonghikai SSA ha ka Jylla”.
U Bah Rymbai u la ong ba na ka liang u Myntri Rangbah u la pyntip ba ka Sorkar ka shimkhia bha halor kane ka mat bad shen kan sa khot da ka jingialang ban ioh ban iakren halor kane ka mat hashwa ba ka sorkar kan shim ia kano kano ka rai kaba khadduh.
“Kane ka jingiakynduh ka long kaba seisoh bad ngi kyrmen ba ka sorkar kan sa wanrah da ka policy ban pynskhem ia ki kam ki nonghikai SSA ha ka Jylla Meghalaya, kumba la leh ha kiwei pat ki Jylla ha ka Ri bad ngi phah ruh ka khubor ban ai khublei ia baroh ki kynhun Myntri kiba la kyrshan ia ka rai jong ka Cabinet ha kaba ia dei bad ki nonghikai SSA” u la ong.