U Myntri Rangbah ka jylla, u Conrad K. Sangma, mynta ka sngi u la pynlong ia ka jingialang ban bishar bniah halor ka jingshlei um ha Garo Hills, kaba la ktah ïa baroh phra tylli ki distrik khamtam ïa ka South Garo Hills bad West Garo Hills. U slap ba khlem sangeh naduh ka shiteng miet jong ka sngi Palei u la wanrah ia ka jingshlei um ha ki thaiñ Dalu jong ka West Garo Hills bad ki jaka ba long madan, ka Gasuapara ha South Garo Hills ruh ka shah ktah jur, ha kaba kawei ka jingkieng jri ka la shah rong noh ha ka um.
Ha kane ka jingjia 3 ngut ki ‘riew paidbah ki la duh noh ia la ka jong ka jingim ha Dalu. U myntri rangbah u la bthah ia ka bor synshar ban pyllait noh ia ka ex-gratia lane ka jingiarap Pisa sha kine ki longïing bad bthah ïa ka bor synshar ban wad ïa kino kino ki jingïarap na ka Sorkar bad ban pynthikna ba ïa ka jingïarap yn pyndep ha ki jaka ba shah ktah.
Nalor kine la pynthikna ba sa 7 ngut ki briew ki la iap ha kawei ka shnong ha Hatiasia Songma na ka jingtwa ka khyndew, kaba hap hapoh Gasuapara PS ha SGH. Ka kynhun NDRF ka dang pynlong ia ka jingwad bad pyllait im ha katei ka thaiñ.
Ka surok ka ba pyniasoh na Dalu sha Baghmara bad kiwei kiwei ki jaka ka la thut namar ka jingtwa khyndew, na ka liang u Myntri Rangbah ka Jylla ula bthah ïa ka bor synshar ban wad ïa ki lad ki lynti ban pynbeit ïa ki jaka iaid lyngba ki surok ha ka thaiñ Dalu–Baghmara.
U Myntri Rangbah ka Jylla u la bthah ruh ba dei ban shna biang ïa ki jingkieng dieng kiba la shah kyndang bad shah rong ha ka um. U la ai jingmut ia ka jingstad jingkieng Bailey na ka bynta ban tei bad kdew ruh ba baroh ki jingkieng dieng ha ka jylla bad yn bujli da ki jingkieng thymmai.
Ki heh sorkar ki la pyntip ba yn sa pynbiang biang ia ka bording ha kiba bun ki bynta jong ka thaiñ haduh mynta ka sngi. U Myntri Rangbah ka Jylla u la bthah ba dei ban pynbiang noh katba lah ban pynsuk ia ka jingim paidbah bad ban pynthikna ia ka jingtreikam kaba biang jong ka jingiarap.