Namar ka jingklumar bad ka jingumsnam ha ka ri Bangladesh ha kine ki khyndiat sngi, la ïoh ia ka jingtip ba katto katne ki nongshong shnong jong katei ka ri ki la sdang ban kiew ha ka Jylla Meghalaya bad la ong ba don katto katne kiba la phetrieh bad don ruh kiba la wan ban shim kabu ha kum kane ka por ban wan tuhmaw bad khaii.
Watla ka sorkar pdeng ka la phah ia ki shipai ban ai ka jingiada ia ka Jylla bad ban khanglad ia ki briew na Bangladesh ban wan kiew ha India, ki paidbah ka Jylla Meghalaya ki dang don hapdeng ka jingsyier namar ka jingkhluit ha katei ka ri ka dang iaid bad la sakhi ruh mynnin ka sngi ka 6 tarik Nailar ki briew ki la thmu ban wan kiew jubor hynrei namar ka jingdon jong ki shipai India, la khanglad noh ia ki ban wan rung hapoh u pud u sam ka India.
Mynta ka sngi (7 Nailar), u Bah Sanbor Shullai, MLA ka BJP ha ryngkat u State Vice President ka BJP, u Gagan Jain bad u State Executive Member jong ka BJP, u Tobias Marak ki la wan ban hiar kyrkieh sha artylli ki khappud ka Bangladesh bad ka India, kata ha Tamabil Jaiñtia Hills bad Bardua East Khasi Hills. Ha kane ka jing leit jurip ba la lam khmat da u Bah Sanbor Shullai ki lah ioh ruh ban ia kren bad u DIG ba dei peit ia kane ka sector u Rana bad u commandant Siam bad lah lap ba ka jinglong jingman ka don hapdeng jong ka jingshongshnaiñ ha ryngkat ka jingtrei shitom ki BSF ban peit pyrman ha man la ka 200 metar jong ki khappud.
Mynnin ka sngi ka lah don ka jingjia ba pynher krad iaki Border Guards jong ka Bangladesh hynrei tang hapoh 24 kynta la lap ba ki Border Guards ki lah wan biang ban pahara iaka jaka khappud.
Namar kane ka jinglong la kloi bad ka jingkylluid mynsiem jong u Bah Sanbor, ki nong shong shnong ki ai ka jingiaroh ia u bad ong ruh ba dei tang ma u shisha u nong mih khmat na ka Jylla u ba wan jngoh bad ai mynsiem iaki. Ha kane ka jingjurip na ka liang u Bah Sanbor Shullai u la pyntikna ba ki bor kiba halor ki la iakhun bad ai kaba bha ban ym jia kano kano kaba sngewsih bad u la ai mynsiem ruh ia ki nong shongshnong ba kim dei ban sheptieng namar ka sorkar ka don ryngkat.