U Myntri ka tnad Social Welfare, u Bah Paul Lyngdoh ha ka 14 Tarik Risaw 2024 u la hiar ban jurip bad plie ruh ia ka ophis treikam ka Women and Child Development Control Room of Child Helpline and 181 Women Helpline kaba don ha ophis treikam ka Directorate ka Social Welfare ha ka jingdonryngkat ka Director ka tnad ka Kong C.D Lyngwa, ki ophisar, ki nongtrei bad kiwei.
Ia kane ka Helpline la bei tyngka da ka Ministry of Child and Women Development, ka Women Helpline ka ba hap ha ka Mission Shakti kaba la sdang naduh u snem 2017 bad ha ryngkat ka jingiatreilang bad ka 1098 (Child Helpline) bad ka 112 (Disaster Emergency) ka la sdang pynkhlaiñ ia ka jingtreikam jong ka, da ka ba wan bun ki jingujor sha kane ka tnad.
Ha kane ka shnat treikam ka don ar tylli ki jingai jingshakri kum ka Emergency Service bad kawei ka long ka Non Emergency Service bad kane ka long katkum ka jingdonkam jingiarap kyrkieh. Naduh ba la thaw ia kane ka shnat treikam la don haduh 600 tam ki case shah thombor ki khynnah ba dang hapoh ka 18 snem kiba kane ka tnad ka la ioh ban lum jingtip (register), bad ki don haduh 778 tylli ki jingjia ba la ioh ki jingujor halor ka jingshah thombor ki khynthei.
Haba kren sha ki ladpathai khubor, na ka liang u Myntri u la ong ba ka jingwanhiar ban jurip ia kane ka ophis treikam ka long ban dang kham pynkhlaiñ ia ka jingtreikam kane ka ophis ha kaba iadei bad ka jingaijingiarap sha ki khynnah rit bad ki longkmie ki ba don hapdeng ka jingeh.
“Mynta ka sngi nga iohi ia ka jinglah ba kin ai ka jingiarap kaba long 90% ia ki khynnah rit ki ba shah thombor, bad ruh ka ju don ka jingpyntip kaba man ka kynta halor ki jingjia thombor ha man ki District” ong u Myntri.
U la bynrap ruh da kaba ong “ka dei ruh ka lad ban bishar bniah halor ka jingtreikam ka Directorate khnang ban lah ban dang pynbha ia ki jingdonkam ha kane ka ophis treikam jong ka Sorkar da kaba kdew ruh ka ne ka tnad kan dang donkam ban pynkhlaiñ shuh shuh ia ka rukom treikam”.
U la kdew ruh ba ka jingbun ki case ka jingshah thombor ki kynthei bad ki khynnah rit ka long namar ba bun ki la kham mih shakhmat ban wan ujor namar ha ki por mynshwa kim ju kwah ban pyntip lane ban wad jingiarap”.
Na ka liang kane ka ophis ka la kdew hangne ba lada don ki khynnah rit ki ba dang hapoh ka 18 snem ka rta ki ba mad ka jingshah thombor ki lah ban phone ha u number 1098 bad kumjuh ki kynthei ki lah ban call ha u number 181 ban ioh ka jingiarap.