Ha ka jingialang ba kyrpang ba la pynlong mynta ka sngi 16.11.2024 ha Community Hall Khliehriat West, ki seng bad ki kynhun bapher bapher kiba ju peit ia ka jingiaid beit ki kam ki jam ha ka khaii, ka pateng, ki la thaw ia ka Joint Action Committee (JAC), ha kane hi ka sngi la jied ruh ia ki nongkitkam bad ki dkhot jong ka JAC.
Ki seng kiba la thaw ia kane ka JAC ki kynthup ki hyniew tylli ki kynhun, ka East Jaintia Coal Supplier and Minerals Association, ka All Jaintia Cement Clinker Association, ka East Jaintia Hills Truck Owners and Transporters Association, ka East Jaintia Drivers Association, East Jaintia Limestone Supplier Association bad ka Jaintia Coal Miners and Dealers Association.
Ki nongkitkam jong katei ka JAC kiba la jied ki kynthup u President, u bah Justine Dkhar, uba dei ruh u MLA barim jong ka Khliehriat, General Secretary, u bah Soomeyo SNS Sayoo, Treasurer, u bah Hambertus Nongtdu, Adviser, u bah Amos Dkhar bad u bah Deibor Sungoh.
La thung ia baroh ki President jong kitei ki hynriew tylli ki kynhun kum ki Vice President, kumjuh ruh baroh ki Secretary jong kitei ki hynriew seng kum ki Assistant Secretary jong ka JAC bad la jied ruh 33 ngut kum ki dkhot ka Executive Committee.
Katkum ka jingiathuh jong ki nongialam ka JAC, la ong ba hadien ba ki la iohi bad bishar bniah ia ka jinglong jingman ka rukom long ka khaii ka pateng, ki la lap ba don bun ki jingdkhoh ha kiba bun ki bynta kiba ju wanrah jingeh bad wanrah ruh ka jingduh nong ia ki paidbah nongkhaii bad kane ka jingduhnong ki nongkhaii ka ktah ruh ia ka khaii ka pateng jong baroh ki paidbah solonsar ba bun ba lang kiba ju im da ka khaii ka pateng ha ka ia die ia thied, kumta ki nongialam bad ki dkhot jong kitei ki hynriew tylli ki kynhun da kawei ka jingmut ki la shim ia ka rai ban thaw noh da ka Joint Action Committee ka ban peit bad jngoh kyrpang ia ka jinglong jingman ka khaii ka pateng ha ri lum Jaintia.
La ong ba kane ka JAC kan khanglad ruh ia ka jingwan tulkar palat ki bor kiba na bar kiba ju wan ban shim kabu ban kamai spah da kaba suk na ri lum Jaintia bad ka JAC kan shim kam ruh ha kiba bun ki bynta kiba iadei bad ka ia die ia thied ba ka rukom pyntyllun ia ka khaii ka pateng ka dei ban long kaba iaid beit iaid ryntih ban im ja lang baroh ki paidbah, namar ka ri lum Jaintia hi ka dei ka jaka kaba ju pynmih buh bha ki mar pohkhyndew, kumjuh ruh ki mar rep bapher bapher bad ka dei ruh ka jaka kaba kiba bun ki nongshong shnong naduh ki por ba mynshwa ki ju im da ka khaii ka pateng.