Namar ka jingleh mynthi bad ka jingleh kyllut halor ka jingdawa ban weng ia ka Meghalaya Minor Minerals Concestion Rules 2016 (Triple MCR), ki nongialam ka Join Action Commitee (JAC) Stone and Crusher owner Association and Quarry owner & worker Association ki la Rai ban sangeh khaii maw bad shyiap naduh ka 21 Tarik Nailar 2024, kaba long ruh kum ka dak ka jingpyrshah ia ka aiñ ka bym iahap ia ki trai shnong ban pyndonkam challan.
Hadien ka meeting ba la pynlong mynta ka sngi ka 19 Tarik Nailar 2024 hapdeng ki nongïalam bad baroh ki briew ki ba trei ia ka kam tih shyiap bad maw na ka thaiñ East Khasi Hills, West khasi hills, Eastern West khasi hills, South West khasi hills la kut jingmut lang ban sangeh khaïi maw/shyiap naduh katei ka tarik ba la kdew haneng.
Na ka liang u President ka JAC u Bah D. Pyngrope, u la pynpaw ia ka jingeh kum ki trai par maw ba rit ba kin mad lada ki bud ia ki kyndon jong ka Triple MCR, bad pynbna ruh ba kum ki briew ba trei ia kane ka kam kin sangeh khaïi maw bad shyiap noh naduh ka ha ki thaiñ ka East Khasi Hills, West Khasi Hills, Eastern West Khasi Hills bad South West Khasi Hills District bad kane ka jingsangeh ban khaïi maw bad shyiap kan bteng tad haduh ba ka sorkar kan shim rai ban pynkylla ia kane ka Rule 2016.
Haba phai pat sha ka jingkren u Bah Mawkordor khar Syiemlieh, General Secretary ka seng ki nongkhaīi shyiap maw West Khasi Hills, u la ther tyngeh ia ka Sorkar ka ba la sngap jar ia kane ka jingeh jong ki nongkhaīi maw bad shyiap ha ka jylla, u la kdew ruh ba kin ym treh da leilei ruh ban shim shalan haba ki khaïi maw bad shyiap namar ba kim dei ki nongshalan maw bad shyiap shabar ka Ri bad byrngem ruh ba lada ka sorkar kam treh ban sngap ia kine jingdawa ka JAC, kin boycott ia ka MDC elekshon kaban sa long shen.
