Ki nongialam Federation of Khasi Jaiñtia and Garo People (FKJGP ) ha ryngkat ka Khasi Jaiñtia Butcher Welfare Association (KJWA) ha ka 27 tarik u Nailur 2024, ki leit ban iakynduh ia ka Deputy Commissioner jong ka East khasi Hills District ka Kong Rosetta Mery Kurbah ban pynpaw ka jing pyrshah halor ka jing thmu jong ka khynhun, Niam Hindu ban pynlong ia ka Rally ban pyrshah bam doh masi ha nongbah Shillong.
Haba kren sha ki ladpathai khubor u President jong ka FKJGP, u Bah Dandee khongsit u la iathuh ba kane ka jingwan iakynduh ia ka Deputy Commissioner ka East Khasi Hills , ka long halor ka jingthmu ban pynlong Rally ka kynhun ki shitniam Hindu ban pynpaw ia ka jingsngew jong ki ba ka masi ka dei ka Blei jong ki.
” Ka kynhun ki nongot dohmasi bad ka seng ka la wan ban kynduh namar ka Jylla Meghalaya ka dei ka Jylla ba bam dohmasi bad ngim sngewiahap ia kane ka kynhun shit niam ba kan wan sha ka Jylla ban pynlong ia kane ka Rally namar lada ai lad ia ki ne ki kynhun kan pynduh Kam pynduh jam ia ki nongot dohmasi ha ka Jylla” ong u Bah Ranee.
Haba kylli, u la iathuh ba ha kane ka jingiakynduh na ka liang ka Deputy Commissioner ka la pyntip ba kane ka kynhun kam shem la wan ban pan jingbit eiei halor ka jingpynlong Rally ha Nongbah Shillong , hynrei na ka liang ka seng ka la kyntu ia ka DC ba kan ym dei ban ai jingbit namar ka jingwan kine ki kynhun kan long kum ka jingpynmih ia ka jingiapher jaitbynriew ha ka Jylla .
U la ong ruh ba kum ka Jylla kam pat ju don kano kano ka jingkulmar kaba mih na ka daw ka niam ne ka jingpher jaitbynriew bad ka dei ka Jylla kaba shongsuk shong shngaiñ, hynrei ka jingpyrshang kane ka kynhun shitniam ka dei ka bym lah ban pdiang da leilei ruh .
Ka FKJGP ka la pynrem jur ruh halor ka jing bym kwah jong u Myntri rangbah u Conrad K Sangma, ban kren eiei halor kane ka mat da kaba ñiad sha ka DC , u Bah Doandee u la ong ba kane ka jingkyntait jong u Myntri Rangbah ban rai eiei ka pynpaw ba um sngewthuh ia ka jingsngew jong ki briew ha ka Jylla .
“Kum u nongialam ka Jylla u dei ban pynpaw ka jingpyrshah halor kine , bad u dei ban buh shwa ia ki jaitbynriew hakhmat bad ia ka Kam Politic hadien namar kane ka jingleh jong u ka dei kaba ym kwah ban pynmong iano iano , hynrei kum u nongialam ka sorkar u la dei ban pynsngew pyrshah beit ia kine ki kynhun shitniam kumba long ki nongialam jong ki sorkar ha kiwei ki Jylla” la bynrap u Bah Ranee.