Hadien ba u Bah Adelbert Nongrum u la wanphai naka jingsumar ha Vellore, u la ther biang sa shisien ia ka Voice Of the People’s party (VPP) kaba la sospen ia u ha kine ki khyndiat bnai bad ka jingsospen kaba khlem ka jingthoh lane ka jingpyntip sha u Lamphang ka ïngdorbar thawaiñ ka Jylla u Thomas A. Sangma.
Ha kaba iadei bad kane, u Bah Adelbert u la ong ba kane ka dei ka kamram jong ka VPP ban pyntip sha u Lamphang hynrei ka kam jong u kan sa sawa hadien na ka bynta ban kren ia ki nongialam ka VPP kiba la sospen ia u na ka seng. “Kane kam dei ka sospen, kane ka dei ka jingbeh seng, kadei ka kam, arsap, ka kam khawpud” ong u Bah Nongrum.
Shuh shuh u la ong ba wat ha ka Shithi sospen ba ki phah sha u ruh ki la pynpaw lypa ia ka jingniewbeiñ. U la iathuh ba kim kheiñ ne ñiew shuh ia u wat kum u nongmihkhmat ki paidbah hynrei ha ka shithi la shu thoh da ka jaka sah jong u, ym shuh ia ka kyrdan trei ne ka kyrdan nongialam ba u la shah jied ha ki paidbah. “Hato kim tip seh ia ka kyrdan ne ka kam jong nga, kane kam dei ba ki ñiewbein ia nga hynrei ia kiba jied ia nga”.
Nalor kata u Bah Nongrum u la kren siat ruh ia u Bah Batskhem Myrboh uba dei u nongaiktien jong ka VPP bad ia u Bah Brightstarwell Marbaniang MLA Mawlai kiba la dei teng ki nonghikai College da kaba ong ba un sa ai jinghikai kylla ma u ia ki namar um tharai ba ki lah ban ai hikai ia ki samla bad kim lah ruh ban ialam ia ki paidbah ha ki rynsan ai jinghikai bapher bapher.
Da ka jingbitar ruh u la ong ba lada ki kwah ban leh ia kano kano wat pynpoi sha u paidbah “Ia ka nongrim bad ia u Paidbah ngin ym pyndonkam bakla ia ki na ka bynta ka jingmyntoi jongno re jongno”.
Haba kylli hato u dang dei ne em u Dkhot jong ka VPP watla u la shah sospon “haduh mynta nga dang dei u VPP, ym don ba lah ban khang ne mana ia nga ban kren, kane kadei ka Ri laitluid ngi lah ban kren laitluid. Lada khang ka konstitushon party jongno re jongne ngam salia hynrei ngan kren da ka konstitushon jong ka Ri India ka “Freedom of Speech and Expression” ong u Bah Adelbert.
