Kum shi bynta ban pynduh ia ka kam khaïi beaiñ ia ki mrad bad kiwei de ki mar sha shiliang u pud ka ri India bad kumjuh ban iada na ka jingshah pynmynsaw jong ki shipai iada khappud (BSF) na ka liang jong u District Magistrate ka West Jaintia Hills District ula pynjari da ka kyndon 144 CrPC habaroh shi lynter khappud ka Bangladesh bad ka West Jaintia Hills District.
Kane ka hukum kala khang ia ki briew ban iaid sha ki bynta khappud (International Border) da ka jingthmu ban jam sha shiliang u pud ne ban rung shapoh u pud u sam ka ri India.
La mana ia kino kino ki kam beaiñ kum ka jingshalan ia ki mrad, ki tiar, u tympew, kwai, ki ktung, ki biri, sikaret, ki slasha bad kiwei kiwei de ki mar. La mana ruh ban rah ia ki tiar pynmynsaw, ki petrol bomb, ki pataka ne ka jingpynmynsaw ia ki shipai BSF.