Mynta ka sngi ka 28.09.2023 ki heh ne ki Bor District jong ka West Karbi Anglong bad ki bor District ka West Jaiñtia kiba kynthup ia ki SP bad DC kumjuh ruh ki Majistrate jong kine ki ar District ki la pynlong ka jingiakynduh ha ka shnong Lapangap, West Jaiñtia Hills District hadien jong ka jingmih jong ka jingia kynad da kaba hap iasiat da ki jri bad khnam ha kine ki ar sngi bala dep.
Mynta ka sngi na ka liang ka West Karbi Anglong la wan ban mih khmat da ka Krishna Baruah, Deputy Commissioner, u SP ka Hamren, katba na ka liang ka WJHD la mihkhmat da u DC bah B. S Sohliya, u SP ma S. Syrti, ryngkat ka jingdon lang u Waheh Shnong ka Lapangap u ma D. Lyngdoh.
Ha kane ka jingiakynduh na ka liang ki heh District ka Karbi ki la ong ba ki paid Karbi ki kwah ia ki Nong Lapangngap ban phut ia ki dieng kiba la thung ha kawei ka jaka bala tip kum ka Pynthor Lapangap khnang ban ailad ia ki nong Lapangap ba kin ioh ban ot ia u kba jong ki ha katei ka jaka.
Katba na ka liang ki bor District bad ki nongshong Shnong Lapangap kim pat ai ia ka rai ban leit phut ia kita ki dieng kiba dang shu dep thung ha kine ki por kiba la dep bad lada leit phut ruh ki bor District hi kin leit ym da ka shnong.
Shuh shuh ha ka jingiadei bad ki nong Lapangap kiba don ia ka jaka rep kba sha ki jaka ne u pud u sam jong ka Kardi na ka liang ki bor District jong ka Karbi kila ong ba kin ai ka jingiada ne synran ia ki nongrep ka Lapangap ban wan ot ia u kba jong ki u ba la ih bad ei por ban ot mynta.
