Ki Nongialam ka National Highway Demand Committee, South West Khasi Hills District mynta ka sngi ka 9 tarik Nohprah 2025 ki la wan kynduh ia u Symbud Myntri Rangbah ba khmih ia ka tnad PWD u Bah Prestone Tynsong ban pynsngew halor ka jingdonkam ban wanrah ia ka Surok National Highway na Mawngap- Mawphlang – Laitmawsiang – Mawkyrwat – Rangthong – Nongnah – Dirang – Khadphra Ranikor.
Haba kren sha ki lad pathai khubor u Chairman ka National Highway Demand Committee South West Khasi Hills District u Bah Kynpham V Kharlyngdoh u la ong ka Kynhun ka kyrpad ia u Symbud Myntri Rangbah u Bah Prestone Tynsong ban wanrah ia ka National Highway naduh Mawngap Mawphlang shaduh Khadphra Ranikor, kumba long ha kiwei ki District baroh ki la pyniasoh ia ka National Highway bad haduh mynta ka Mawkyrwat kam pat don bad ka don ka jingshah ieh khunswet naduh 2012 naduh ba ioh ia ka District.
Kumta na ka liang ka kynhun ka kyrpad ia ka Sorkar Meghalaya ba kan pynsngew sha ka Sorkar India ban wanrah ia kane ka Surok National Highway naduh Mawngap ter ter sha Mawkyrwat haduh Ranikor.
U la ong ruh ba na ka liang ka Sorkar ka ialeh ban pynbha ia ki surok ha Mawkyrwat hynrei na ka liang ka kynhun kam don jingpyrshah haba iadei bad ka jingpynbha ia ka Surok ha Mawkyrwat namar ka kynhun ka dawa na ka Sorkar ban wanrah ia ka Surok National Highway ha Mawkyrwat.
Khatduh u la ong ba na ka liang u Myntri ba khmih ia ka tnad PWD u kular ban shimkhia bad ka kynhun kan iai buddien ia kane ka jingdawa ban wanrah ia ka Surok National Highway.
