Ka long ka jingjia ba sngewsih kaba la ngat ia ka wei ka longïing ha shnong Pynthor Langteiñ, West Jaintia, ha kaba saw ngut ki mynsiem briew kiba dei na ka juh ka ïing kila duh ei noh ia la ka jingim ba kordor ka jong ki, kiba kynthup ia ar ngut ki khun, ka kmie bad u kpa. Kane ka jingjia ka dei na ka daw ka jingtwa ka khyndew na sharing lum ba don sha ki bynta ba shadien jong ka ïing bad ka la leit ban ia katei ka ïing ha ka shiteng synnia.
Ka jingther palat u lap bah lap san ha kine ki khyndiat sngi kala pynlong ia ka kyndew ban btuid bad hap ha ki bynta jong ka kamra thiah katba kitei baroh saw ngut ki dang ioh thiah lyngngai.
Ia kine shi ïing shi sem kiba la ngat ha kane ka apot, la ithuh kum u ma Biangki Phawa 29 snem ka rta uba dei u kpa, ka kong Pynjanai Rynkhlem ka kmie, u khun nyngkong u Edfify Ryngkhlem 5 snem ka rta ba dang pule class Arit bad ka khun ba-ar ka Evadaroi Ryngkhlem kaba dang 3 snem ka rta.
Ha ka jingiakren bad u kñi jong katei ka longkmie kaba la khlad noh, u ma Hermon Ryngkhlem, u la iathuh ba kane ka jingjia ka lah ban jia ha ka por shitieng miet hynrei la iohi da ki para marjan ne parashong dei ha ka por kumba 5 baje ei ei hynne ka step jong ka sngi U Blei, ha kaba ia ki met jong ki la sei kloi kloi katba lah da ki nongshong shnong, hynrei kat ban da ioh ban seit lut ia baroh kine ki saw ngut ki la khlad noh lypa.
Na ka liang jong u ma Hermon u la ong ba kane ka long ka jingduh kaba khraw ia ka kur ka jait jong ki, u la iathuh ba u kpa jong ka iing u dei uba trei shitom da kaba trei bylla bad ka kmie ruh kumjuh ha kaba u khun ba nyngkong haba u wan skul u shait leit iarap ia ka kmie man la ka sngi ha ka kam shoh mawria.
Ia ka met iap jong kine ki 4 ngut la leit rah ha kawei pat ka ïing jong kiba ha ïing hi ban ioh pyndep ia ka niam ka rukom kaba dangsah na ka bynta jong ki.
