Hadien ka jingpynbna da ka tnad District Council Affairs, ka 21 tarik February 2025 kum ka tarik thep vote na ka bynta ka General Election sha ka Ïingdorbar Jaiñtia Hills Autonomous District Council, 2025 vide No.DCA.65/2024/12, dated Shillong the 27th January 2025, na ka liang jong u District Magistrate jong ka West Jaintia Hills District u la pynmih ia ka hukum katkum ka kyndon 163 BNSS ban khang ia kino kino ki jingialum paidbah naduh ka por 4.00 baje janmiet jong ka 19 tarik u February, 2025 haduh ka por 4.00 baje janmiet jong ka 21 tarik u February, 2025.
Ka hukum ka khang ban ïalum ne ïaid paidbah 5 (san ngut) ne palat ha ki kynhun bad kumjuh ruh ban khot, ban pynbor, ban leit, ban ïasoh ne ban kren ha kano kano ka jingïalang paidbah ne ka jingïaid proseshon ha kaba ïadei bad ka elekshon. Nalor kata, la khang pyrshah ban pyndonkam da ki speaker na ka bynta kino kino ki kam kiba iadei bad ka elekshon ha kine ki por 48 kynta.
Ka hukum ka ong ba ki 48 kynta shwa ban thep vote ki long kiba kongsan haduh katta katta na ka bynta ki mashin elekshon, ym tang na ka jingïohi jong ka jingthmu jong ka sngi thep vote, hynrei kaba kham kongsan eh, na ka liang ka aiñ bad ka jingthaw na ka bynta ka jingthep vote kaba laitluid bad kaba hok. Hapoh ka por kaba 48 kynta kaba kut ha ka por ba la buh ban khang ia ka jingthep vote, ka jingialap elekshon kan poi sha kaba kut bad kumta, kane ka por ha ka jingshisha ka long ka por ha kaba baroh ki jingialap elekshon lyngba ki jingialang paidbah bad kiwei kiwei, la pynsangeh noh.
Shuh shuh la bthah ia ki nongtrei sain pyrthei/ki nongtrei party/ki nongialap elekshon bad kiwei kiwei, kiba la wanrah na shabar jong ka Constituency bad ki bym dei ki nongthep vote jong ka Constituency ba kin mih noh na ka Constituency namar ka jingbteng jong ki hadien ba la kut ka jingialap elekshon ka lah ban pynthut ia ka jinglong jingman na ka bynta ki jingthep vote. Ka jingpynsah ia ki briew kiba nabar ha ki ïingjaiñ/ camp/ ki jaka ïalang paidbah, bad kiwei kiwei la khang pyrshah.
Hynrei ia kata ka jingkhang ym lah ban pynbor ha kaba iadei bad u nongkitkam jong kano kano ka seng sain pyrthei uba dei u nongpeit ia ka Distrik. Nalor kata, baroh ki exit poll/opinion poll bad ka jingpynmih, jingpynbna ne jingpynphriang ia kum kine ki poll ha kano kano ka rukom, ha kino kino ki lad pathai khubor ba la shon ne electronic media, kynthup ia ki social media la khang pyrshah ha kane ka por.