-Ka sorkar ka dei ban shim ïa ka jingkitkhlieh halade ban pynthikna ba baroh ki khynnah pule kiba don hapoh Jaiñtia Hills District kim dei ban duh ïa ka jaka pule jong ki, la ong ka Jaiñtia Youth Federation (JYF)-
Ka JYF ka phah ïa ka kyrwoh khubor sha ka sorkar jylla lyngba ki lad pathai khubor, ba ka sorkar jylla lyngba ka Education Department ka dei ban shimkhia hi noh mardor bad ban pynthikna ba baroh ki khynnah skul kiba don ha Ri Lum Jaintia ban pynïoh jaka pule ïa ki.
Kumba shu pynkynmaw ba naduh ki snem 2021, 2022 ka seng kala shim khia ban ïakren bad ka jingeh ki samla pule ha ba ïadei bad ka Admission jong ki bad ki wan ban kyrpad sha ka seng bad na ka liang jong ka JYF ka la shim khia ban ïa kren bad ka sorkar bad haduh ba poi ruh u pud ba ka JYF ha ryngkat ki khynnah skul bad ki kmie ki kpa ki hap ban mih sha surok ban dawa ïa ka hok jong ki khynnah skul bad ka sorkar kam banse ka hap ban sngap ïa ki jingdawa kiba shong ñia bad ba don nongrim bad ka sorkar ka la plie ruh ïa ka morning section ha Government Boys’ Higher Secondary School Jowai.
Naduh kata ka por ka Jaiñtia youth Federation (JYF) ka la dep ban kren shai ïa ka sorkar jylla lyngba ka Education Department kumjuh bad u Chief Minister u Conrad K. Sangma ha ophis u Deputy Commissioner jong ka West Jaiñtia Hills District, ba nangne sha khmat ki khynnah skul kim dei shuh ban dang mad ïa kum kane ka juh ka jingeh ha ki snem ban dang wan. Ha kaba na ka liang jong U Chief Minister ruh u lah kular ïa kane ka bynta.
Kumban shu pynkynmaw ka JYF kala dep ban ai ruh da ka jingthoh sha ka Education Department jong ka sorkar jylla ban pynkiew kyrdan ïa ki Govt Secondary School ba la don lypa sha ki Higher Secondary School, kum ïa ka Public Secondary School Jowai bad ban pynbun ruh ïa ki Govt. Higher Secondary School ha baroh ka Jaiñtia Hills, namar la ïohi bad shem ba ki ba bun hi ki khynnah skul ki ïa beh ban shim Admission ha ki Skul sorkar namar kane ka ïarap ïa ki khamtam kito ki khynnah skul kiba wan na ki longïing longsem ba duk ba kyrduh kim bym kot bor ban leit pule ha ki Skul shimet (private institutions).
Kum ka seng ka don ïa ka jingkyrmen skhem ba ka sorkar kan shim khia ha ba ïadei bad ka Admission jong ki khynnah pule, la pynkut ka kyrwoh na ka seng.