Ki dkhot jongka KSU Ranikor Circle hynne ka sngi 14 tarik Nailar haka por kumba 1 baje eiei nohphai sngi ki la ioh ban bat ia 24 ngut ki bym dei Khasi ha Ranikor kiba dang wan kiew na ka thaiñ khappud na ka shnong Maheshkhola, South West Khasi Hills District kaba dei ka khappud jong ka Ri Bangladesh.
Hadien ba la lap ba kim don iaki kot ki sla kiba biang la aiti noh ia kitei ki briew sha ki Pulit jong ka Ranikor Police Station ba kin leh ia kaba donkam.
Na ka liang seng ka kyntu ruh iaki shipai iada khappud (BSF), ia ka tnad pulit bad ruh iaka District Administration jong ka South West Khasi Hills District ba ki dei ban shimkhia halor kane ka mat ba wan kiew ki briew bym dei ki trai ri trai muluk khamtam na ki thaiñ khappud namar la don ka jingsuba jur ba ki lah ban don ki briew na Bangladesh kiba wan kiew hadien ba ka la don ka jingkulmar hapoh Ri Bangladesh ha kine ki por ne ki don kiba thmu wan bylla ha kane ka jylla.
Ka KSU ka maham ruh ia ki Contraktor bad ki nongai kam ba kim dei ban pyrkhat tang iaka iohnong shimet da kaba khot iaki briew na shabar jylla ban wan trei ne ban wan bylla hynrei ki dei ban husiar ioh kan mih kaei kaei ka jingeh hadien ha bud.