Ka United Democratic Party (UDP) jong ka West Jaiñtia Hills District ka la ioh ban pynthymmai ia ki nongkitkam jong ka ha kane ka 20 tarik mynta u bnai, ha ka jingialang kaba la pynlong ha nongbah Jowai hapoh Infinity Hall, Moralong, ha ka jingiadonlang jong ki ar ngut ki MLA ba kynthup ia u ma Lahkmen Rymbui na ka Amlarem L/A Constituency bad u ma Nujorki Sungoh na ka Mowkaiaw L/A Constituency.
Ha kane ka jingpynpynthymmai nongkitkam u ma Lahkmen Rymbui ula ioh ban bat ia ka kam President bad u ma Nujorki Sungoh kum u General Secretary jong ka UDP, West Jaiñtia Hills District. Ia ka kam Vice President la jied ia u ma J.Treilang Suchiang (MDC) bad u ma Winning Garland Sungoh (MDC), Joint Secretary la jied ar ngut ia u ma Onyx Suchiang bad ma Marki Mulieh (Ex-MDC), Treasurer ma Lamdibok Sumer (Ex-MDC) bad Adviser la jied ia u ma Michael Sayoo (Ex-MDC).
Ka jingialang kala jied ruh ia ki dkhot na ki Constituency bapher bapher ba kynthup ia u ma Bhawan Chyrmang (Ex-MDC) bad ma Brington Shylla (Ex-MDC) na ka 4-Mowkaiaw Constituency, ma Kolmen Pohshna bad ma Herman Khonglah na ka 7-Amlarem Constituency bad ia u ma Ripil Rabon bad Justine Phawa na ka 3-Raliang Constituency. Katba ia ka dkhot na ka 1-Nartiang bad 2-Jowai yn sa thung ha kawei pat ka jingialang.
Ka jingialang ka la thung ruh ia ki lai ngut ban long ki Convener jong ka Youth Wing ka UDP West Jaiñtia Hills District ba kynthup ia u Eleazer C. Dkhar, u Dawan Lyngdoh (MDC) bad u Medalin Swer.
Ia ki nongkitkam jong ka Women Wing bad ka Farmer Wing la iakut ban jied ha kawei pat ka jingialang jong ka Party ka ban sa long shen ha ka taiew ba nyngkong jong u bnai Kyllalyngkot 2024.