Ki ar tylli ki seng kiba kynthup ïaka Hynñiewtrep National Youth Front (HNYF) Nartiang Circle bad ka Jaiñtia People Welfare Organisation (JPWO) mynta ka step jong ka 18.08.2023, ha ka jingïalam u President HNYF-NC bah D. S. Symblai bad u President JPWO bah R. Nongtdu, kila beh ne phah leit phai ïa ki 18 ngut ki dkhar bar jylla ki ba shong ba sah ha kawei ka jaka kaba dang hap hapoh u pud u sam jong ka shnong Moodop WJHD kiba trei hapoh ka Dhar Company bad ki bym biang ïa ki kot ki sla kum ki Labour License, Work Permit bad kiwei de ki kot donkam.
Kat kum jingtip jong ka seng ba kine ki bar jylla ki ba ïoh ïa ka permit ban trei ha East Khasi Hill District, kaba dei ka Construction of Mawlyndep road. Hynrei kaba phylla ki wan trei pynban sha poh Jaiñtia, na ka liang ka seng kala pynrem jur ïa ka Dhar Company, kaba wan rah kum kine ki bar jylla bad ka rukom leh kane ka Company ka pynduh nong ïa ka District Council, sa kawei ruh ka ktah ïa ka kamai kajih jong ki trai ri trai muluk ne ki Khasi Pnar da ka ba ai bylla ïa ki bar jylla.