Mynta ka sngi ka 27/07/2024 ka Jaintia National Council (JNC) Western Zone hapoh ka jinglam jong u President u Leo Ferdinand Dhar bad u Organising Secretary u Rapmiki Pohti kila wan iuhkjat sha ka thaiñ War Jaiñtia ha kaba iadei bad u surok Pdengshakap shaduh Muktapur hadien ba ka seng kala iohsngew iaka jingud jingnam jong ki nongshong shnong jong katei ka thaiñ halor ka jingsniew palat une u surok ba dang shu dep shna.
Ia une u surok la mang ban shna naduh u snem 2022 bad ha une u snem 2024 la sdang noh iaka jingshna hynrei kaba sngewsih bad sngewphylla ka long ba tang ha kine ki khyndiat bnai balah dep shna, une u surok u la jot la pei la kum bym pat shna hi, imat kane ka jingleh u contractor ka long tang ban myntoi ialade khlem da pyrkhat shuh iaki rit ki ria.
Haka jingleit jurip mynta ka sngi, naka liang u samla Rapmiki Pohti ula ong ba katno tam ka jingkmen bad ka jingkyrkhu ia ka thaiñ war ban ioh ia u surok ba thymmai ban suk ka leit ka wan khamtam ka kamai kajih, hynrei phewse ka kylla long da kumwei pat.
Shuh shuh ula ong ba ka jingshna ia une u surok ruh khlem ki nala (side drain) kam long kaba bha ia u surok ba un neh slem khamtam sha thaiñ war ba bun ki um ki wah.
Naka liang u President ka Western Zone u la ong ba ia kane ka bynta ka seng kan nym shong kli kti bad kan sa buddien ia kane ka kam sha ki bor badei ban peit khnang ban ioh leh ia kaba donkam namar ban shu lehkai iaka pisa jong u paidbah ka long ka kam kaba poh tam bad ka seng kan nym aili da lei lei ruh.