Bitar ka JNC-Western Zone halor ka jingbym pynmih ka sorkar jylla ia ka Meghalaya Anthem ha ka ktien Jaiñtia

Ka Jaiñtia National Council JNC- Western zone haka kyrwoh na u Vice President bah Hamehi Bamon kala dap da ka jingbitar ha kaba iadei bad ka jingpynmih jong ka sorkar jylla ia ka Meghalaya State Anthem ha kane ka 20 Tarik u ne u bnai 2024 hapoh ka jingialam u Conrad Sangma, ha ka ba la paw tang ha ka ktien Khasi, Garo bad ka English. Ka seng ka pynpaw ia ka jingbym sngew pdiang da lei lei ruh ia ka jinglyndet ka sorkar ia ka ktien Jaiñtia na kane ka jingrwai anthem.
Kum ban shu pynkynmaw ba ka Meghalaya ka dei ka jylla jong ki lai jait ki riewlum kata ka Khasi Garo bad Jaiñtia, naduh ba la ioh ia ka jinglaidluid na ka jylla Assam ha u 1972 ka lah don ka jingthoh ba ka Meghalaya ka don lai tylli ki major tribes Khasi, Garo bad Jaiñtia hynrei ka jingbym burom ka sorkar ia ka ri lum Jaiñtia kaba don la ka jong ka ktien ka pyni shai ba kane ka sorkar hapoh ka jingialam u Conrad Sangma ka la ibeiñ bad iuhroit ia ka hok jong ka Ri lum Jaiñtia bad na ka Liang jong ka seng kam lah ban pdiang ia kane ka jingleh jong ka sorkar.
Donkam aiu ban pynmih ia ka anthem ha ka ktien nongwei (English) bad ieh pat ia kaba lah don lypa? Kylli ka JNC. ka Jaiñtia Hills Autonomous District Council JHADC ha u 2021 ka la pass ia ka resolution ban ithuh noh ia ki dak thoh ha ka ktien Jaiñtia na ka bynta ka Jaiñtia Hills bad mynta ka sorkar kala pyni shai ba kam shym la burom satia ia ka Rai ka District Council bad kane hi ka la paw shai ba ka Sorkar imat ka don aiu re aiu sha lyndet ban pynduh noh ia ka Ri lum Jaiñtia kaba la ri la sumar naduh ki Nongialam na hyndai hynthai.
Ka seng ka dawa na ka sorkar ba kan pynkylla ne pynmih shisyndon ha ka ktien Jaiñtia lym kumta ngim nym pdiang satia ia kata ka State Anthem hapoh Ri lum Jaiñtia ia kaba lah pynmih da ka sorkar ha kato ka sngi ha District Library Auditorium Tura.
Kaba pynsngewsih shuh shuh ia ki nong Jaiñtia ba ha kato ka video ba la mih ruh naduh ka shad tynrai haduh ka riam tynrai ka Jaiñtia kam paw satia tang khyndiat ha kaba iadei bad ka riam bad ka shad tynrai ki nong Jaiñtia, bad kane kala pynduh mynsiem shi katdei eh ia ki nong Jaiñtia bad ia kane ka Sorkar ka hap ban jubab ba na kaei ka daw ba la pynduh bynta ia ka Jaiñtia.
Ka JNC ka pynpaw ruh ia ka jingsngewsih ha ka ba iadei bad ki nongmihkhmat ka Ri lum Jaiñtia, ki don haduh 7 ngut ki MLA bad 30 ngut ki MDC hynrei ki shu peitkai bad sngap jar ia kane ka jingleh ka Sorkar, hato ki pdiang ne em ia kane ka bynta?
Ka seng ka sngew ruh ban ong ba ha ba don lai ki major tribes ka sorkar ruh ka hap ban burom ym ban shu leh lyndet, balei ka Ri lum Jaiñtia kam don hok ban ioh bynta lem? Pynkut ka kyrwoh na u Hamehi Bamon, Vice President JNC-Western zone.