Ka Krishi Vigyan Kendra (KVK) Jaiñtia Hills, mynta ka sngi 9 tarik u Jylliew kaba dei ka sngi ba khadwei (11) na ka prokram ‘Viksit Krishi Sankalp Abhiyan’ (VKSA) kila bteng ban leit ai jinghikai ïa ki nongrep ka Jaiñtia Hills kaba kynthup ïa ki 9 tylli ki shnong kiba hap hapoh ka Thadlaskeiñ Block, Laskeiñ Block bad ka Khliehriat Block.
Kine ki shnong ha Thadlaskeiñ C&RD Block ki kynthup ïa ka Madur, Wahrymbai bad ka Lumchyrtoh. ha Laskeiñ Block kynthup ïa ka Umdienglieng, Niawkmai bad Iooski. Katba ha Khliehriat Block ki kynthup ïaka Jalyiah, Khliehmyntriang bad Mookhep, baroh ki nongrep kiba la wan ïashim bynta ki don haduh 968 ngut.
Na ka liang ki dkhot ka KVK kiba leit ban ai jinghikai sha ki nongrep la pynbynta ha la ki jong ki kynhun ha ryngkat ka jingdonlang ki Scientist, ki ophisar bad ki nongtrei ka tnad ka rep ka riang.
Ha kane ka prokram, la ïa jinghikai ïa ki nongrep naduh ka rukom rep ïa ki jait soh, ka rukom ai dawai ïa ki jingthung ka rukom pynïaid ïew ïa ki mar rep, ka rukom ri ïa ki jingri, nalor kiwei kiwei de kiba long katkum ka jinghikai jong ka juk stad mynta (technology).
La batai ruh shaphang ki skim bapher bapher jong ki nongrep kiba lah ban ïoh na ka sorkar kum ka Insurance Scheme, PM Kisan Scheme, MIDH Scheme, PDMC, MOVCD-NER, PMFME, Soil Health Card, PMFBY nalor kiwei de ki skim kiba lah ban ïoh jingïarap.
Ha kane ka sngi la sam ruh sha kitei ki nongrep kiba hap hapoh kitei ki Block da ki symbai soh bad ki synbai jhur kiba lah ban rep haka aiom ban wan.
