Ka Krishi Vigyan Kendra (KVK) Jaiñtia Hills mynta ka sngi ba saw kala bteng ïa ka prorkam ‘Viksit Krishi Sankalp Abhiyan’ da kaba leit ai jinghikai sha ki nongrep jong ki 9 tylli ki shnong da ka jingwan ïashim bynta ki 689 ngut ki nongrep ban ïoh jingtip shaphang ka rukom rep ba thymmai hapoh ka Ri.
Na ka liang ki dkhot kiba leit ban ai jinghikai sha ki nongrep jong kitei ki shnong kiba hap hapoh ka Thadlaskeiñ bad Amlarem C&RD Block la pynbynta ha ki lai kynhun ka Team-1, Team-2 bad ka Team-3 ha ryngkat ki Scientist, ki ophisar bad ki nongtrei ka tnad ka rep ka riang.
Ha kane ka sngi la ai jinghikai ïa ki nongrep halor ka rukom thung ïa ki mar rep katkum ka juk stad ba mynta, ka rukom pynïaid ïew ïa ki mar ki mata, ka jingpyndonkam ïa ki kor (machine) kiba lah ban ïoh na ka sorkar lyngba ka skim, ka rukom ri jingri naduh ki sniang, syiar, blang, ki masi bad ka kam ri ngap.
Ha kane ka sngi la sam ruh ïa ki kot lyngkdop kaba batai shaphang ki rukom rep ïa u jhur ki soh, ïa u shynrai lakadong bad kiwei de. La batai ruh shaphang ka skim PMEGP kaba don ha DCIC, ka PM-Kisan Samman, ka CM Assured Scheme nalor kiwei de ki skim bapher bapher.
