Ka Ladthadlaboh Dorbar Shnong hapoh ka jingialam u ma A.B.M. Shullai u ba u Waheh Shnong ryngkat u ma E. Phawa General Secretary bad ka Dorbar Shnong hi baroh, kila shim ia ka rai ban ai ka jingkyrshan ia ka Khooid Ya Ka Wah Myntdu, kaba lam khmat da u ma Khroo L Pariat President Khooid Ya ka Wah Myntdu, ha kane ka jingiakhun ban dawa na ka ka NGT Principal Bench New Delhi, ha ka jingiadei ban iada, ban pynbha bad ban pynmiat ia ka wah Myntdu kaba long ka jingim jong ki briew kiba im bad ba sah ha baroh shi lynter jong ka. Ha kaba na ka liang ka Dorbar Shnong Ladthadlaboh kala ai 5 hajar tyngka sha ka pla ka KYM.
Katba ka Loomiongkjam Dorbar Shnong ruh ha ka jinglam khmat u ma M. Challam Waheh Shnong, ka la synniang 2500 tyngka, ia kaba la aiti ha u President KYM. Ka KYM ka khmih lynti ba ka NGT Principal Bench, kan ai ia ka hok ka wah Myntdu, na ka bynta ban im ban shong shngiañ ka pateng kiba shong ba sah sawdong ka wah Myntdu.
Shuh shuh, na ka liang u ma Dawiangbha Passah Chairman bad u ma Da o Chwa Challam, Secretary ryngkat bad ki dkhot ka Ïeibha Rta Society Jowai, ki la ai kylluid Rs. 5500 tyngka sha kane ka jingiaid lynti jong ka KYM, na ka bynta ka jingiada ia ka wah Myntdu bad ia ki briew kiba dang pyndonkam ia ka um na ka wah Myntdu.
