U Symbud Myntri Rangbah ka sorkar jylla u ma Sniawbhalang Dhar uba dei ruh u MLA ka 1-Nartiang Constituency ha kane ka sngi Balang 23 tarik u Ïaïong, ula bteng biang ban sam ïa ki tin sop ïing sha ki 600 tylli ki longïing halor ka thong ban kot sha baroh ki 5000 tylli ki ïing hapoh ka Constituency jong u.
Kine ki 600 tylli ki ïing kiba la sam ha kane ka sngi kiba kynthup hapoh ka shnong Ummulong, Thadmusem bad ka shnong Bamkamar. Ïa kine ki tin la sam haka jingdonlang u President ka National People’s Youth Front (1-Nartiang) u samla Damechwapaya Dhar lem bad kiwei de ki para samla.
Haba ai jingkren u samla Damechwapaya ula pynpaw ka jingsngewnguh ïa u MLA ka thaiñ uba la pynïoh ïa kitei ki tin ïing sha manla ki thliew ïing ha kum kane ka por kaba biang eh namar ba la poi ka aiom slap.
Ula ai khublei kumjuh ïa baroh lang kiba ïadon bynta lang ban pynïaid shakhmat ïa kane ka kam.
Kum ban pynkynmaw dang ha kine ki sngi bala dep u ma Sniawbhalang ula dep ban sam sha ki 600 tylli ki ïing ha shnong Wahiajer bad kiwei de ki shnong ba marjan.
