Kan long ka khana ka ban sah kynmaw na ka bynta ka Jirang Constituency bad na ka bynta ki skul kiba don ha kane ka thaiñ, ha kaba u Myntri Rangbah ka Jylla, Conrad K. Sangma u la leit ban iuhkjat ha ka sien ba nyngkong ha kane ka konstitwensi ha kaba la wanrah ruh katto katne ki jingmyntoi ia ki skul ba don ha katei ka konstitwesi bad khamtam ba u Myntri u la iohi da la ki jong ki khmat ia ka jingdonkam bad ka jingeh jong ki briew ba don ha katei ka thaiñ.
Ha kane ka sngi la synran lang ia u MR da u MLA Jirang Constituency, Bah Sosthenes Sohtun ha kaba la ioh ruh ban leit jngoh ia ka shnong Nongspung A. Ha katei ka shnong kaba don ia ka Garo Govt. L.P School, u Myntri Rangbah u la lap shibun ki jingduna namar ka dei ka skul sorkar kaba la rim bha ha ka thain, ia kaba la sdang ha u snem 1977.
Lyngba ka jingioh ia ka kabu ban sakhi da la ki khmat ia ka jingdonkam jong katei ka skul, u Myntri Rangbah u la pynshai ba ka don ka bhah kaba la mang haduh 3000 klur na ka bynta ban maramot bad pynheh ia ki skul Govt. L.P bad U.P School, Secondary, Higher Secondary School bad ki College. Nalor kata, u Conrad u la iathuh ba hadien 7 snem la sdang ia ka jingmaramot ia baroh ki skul kiba la shah ieh khunswet, kumta kumba 300 tylli ki dang sah. Shuh shuh u la iathuh ba mynta u hap ban peit ruh ia ka jingdonkam jong kiwei pat ki skul ki bym dei ki skul Sorkar, kynthup ia ka S.S.A, Adhoc bad Deficit.
Haba ioh ban iakren markhmat bad katto katne ki Nonghikai, ryngkat ka pyni jingeh jong ki, u Sangma u la ong. “ngi wan hangne ban sngap bad sngewthuh ia ka jingdonkam jong ki briew na kane ka thaiñ bad kumba ngi iohi ba ki skul ki long kiba la jot rathai, kumta ryngkat bad u MLA jong kane ka thaiñ, ngi la mynjur ban iatreilang bad pynbiang da kaba ngi ai ban trei khyndiat khyndiat ryngkat ka skhim kaba la wan na ka CMSDF bad SSA skhim. Ngin sdang noh shen ia kane ka bynta na ka bynta ka jingtei kumjuh ruh ngi la kular ruh ban pynbiang ia ki tiar tem bad ki tiar ialehkai bad katto katne mynta ka sngi ngi la wanrah bad ngi la ioh ban sam ruh sha uwei na ki khynnah skul.
Ha ka jingiuh kjat ha kane ka thaiñ kaba don khleh ia ki Khasi bad Garo, u MR u la pynpaw ia ka jingkmen bad kular ban shimkhia da kaba kren shai ruh ba kane ka thong kan iaid kumba long ha kiwei ki konstitwensi hynrei yn ym lah ban pynurlong ha kajuh ka por ia baroh ki jingdonkam namar yn iaid suki suki katkum ka jingiaid beit jong ki skhim kiba la wan.
