Ka tnad ba dei peit ia ka jinglong jingman jong ka suiñbneng ka India Meteorological Department (IMD) ka ai ka jingbthah ia baroh ki paidbah nongshong shnong ka Jylla ban long kiba husiar bad phikhir bha hapoh kine ki khyndiat sngi namar ka jingjur jong u slap kan dang iai bteng tad haduh ka 13 tarik mynta u bnai.
Na ka liang ka tnad IMD kala pyntip ba naduh ka 9 tarik haduh ka 13 tarik mynta u bnai kan don ka jinghapslap kaba jur ha ki bynta jong ka West Bengal, Assam bad ha ka jylla Meghalaya ruh kynthup ia ki katto katne tylli ki jylla hapoh ka thaiñ shatei lam mihngi. Hapoh kine ki 5 sngi lynter kin sa don ki bynta kiba u slap un hap malu mala bad kin don ruh ki bynta ba un hap jur.
Kumta ka tnad IMD kala bthah ia baroh ban long kiba phikhir, kim dei ban tur sha ki bynta da don ki um ki wah, ban kiar na ki jaka ba long synjor, dei ban shong ha ki jaka ba shngain haba don ka jingtied ka leilieh bad ruh dei ban khohnguh ia ka jingaijingmut jong ki bor pulit pyniaid kali.
Ka IMD ka pyni ruh ba ka jinghap slap mynta ka sngi ka long; ha Baghmara 153.8mm, Williamnagar 98.0, Tura 92.4, Shella 158.0, Mawkyrwat 73.0, Mineng 98.5, Rongara 109.5, Mawsynram 54.4, Khliehriat 32.8, Jowai 41.4, Amlarem 66.5, Barapani 41.9, Sohra 32.4 bad Shillong 17.6 mm.