Ha kaba iadei bad ka khlam Covid-19 kaba la sdang ban ioh jaka biang ha katto katne ki jylla jong ka India, ka Myntri ba khmih ia ka tnad jong ka Koit ka Khiah ka Jylla, ka Kong Ampareen M. Lyngdoh hynne ka sngi ka la ai ia ka jingpynthikna ba ka Sorkar Jylla ka la dep ban pynkhreh janai ban iakhun ia katei ka khlam bad ba ki paidbah kim dei ban sheptieng ne syier lada poi biang katei ka jingpang ha ka Jylla.
Ka Kong Ampareen ka la pynshai ba ka Sorkar ka don ryngkat bad ki briew ka Jylla bad mynta ruh ki dang ïit bniah kiei ki lad iada na ka bynta ban pynsuk bad pynmyntoi ia ki riew paidbah “Lada phi kylli, phi (sorkar) la pynkhreh ne em, ngan ong hooid. Ka Covid mynta ka long kum ka jingpang khieshoh ha ki spah snem kiba 19 ha kaba ym don ruh ki dawai hynrei mynta ia ka Covid, ka Sorkar jylla ka la pynkhreh bad ki paidbah ki dei ban iasnohkti lang. Lada don mano mano ba ioh ia ka jingjyrhoh ne kino kino ki dak ba paw shabar ha kaba iadei bad u Covid, sngewbha leit ban pyndep ia ki test ialade kloi kloi. Lada jia ba la ngat ha katei ka jingpang dei ban kohngoh katkum ki jingbthah. Ngi la tip ruh kumno ban leh bad kumno ban iada ia ka jingpang Covid. Nga kyrpad ia baroh ki nongshong shnong ka Jylla ban sumar bha ialade namar ka jingsumar lypa ka kham bha shibun ban ia kaba hap ban iaid lyngba ia ki jingsumar”
Ka Myntri ka la pynkynmaw ba kane ka jait jingpang kam dei shuh kaba thymmai bad ka Sorkar India ka la pynkhreh janai lada sar biang kane ka jingpang. Nalor kata, ka la pyntina ruh ba ka Sorkar Jylla ka la shim ia baroh ki synjam lada donkam ban leh ei ei. “Ia mynta, ngi lah ban pynbna sha ki paidbah ba ngi la don ia ki tyllong Oxygen, ngi la biang ki jingthiah na ka bynta ki ICU, ngi la pynkhreh ruh ki dawai bad kata kadei ba ka Sorkar Meghalaya ka la dep ban peit bniah”.
Shuh shuh ka Myntri ka la ong ba wat ha ki nongkyndong ruh la pynbiang ia ki PHC bad CHC bad ki don shibun ki jaka sumar ia kaba la nangtei thymmai bad pynbha kaba dei shi bynta ka jingpynkhreh ia katei ka khlam kaba la sdang im biang mynta ha ka Ri.