Ka tnad jong ka koit ka khiah ka sorkar Jylla lyngba ka ophis jong u Principal Secretary Department of Health and Family Welfare kala pynmih ia ka jingpyntip paidbah ban long kiba husiar bad phikir bha na u Covid-19 da kaba bud ia baroh ki kyndon kiba la buh daka tnad ka koit ka khiah.
Ia kane ka jingbthah ka sorkar kala hap ban pynmih khamtam ha kine ki por ba don ka jinglehkmen Christmas bad New Year namar ba mynta ki don ki ri jong ka pyrthei kiba la sdang jur biang ka jingtrei jong kane ka khlam Covid-19. Kumta la kyntu ia ki paidbah nongshong shnong ka Jylla baroh ba ki dei ban phong ia ki Mask khamtam ha ki jaka paidbah bad ruh ban bud ia ka jinglehkhuid.
Na ka bynta kito ki briew kiba wan poi na shabar ka ri India ki dei ban peit thuh bha ialade ia ka jinglong jingman jong ka koit ka khiah jong ki la kumno kumno 7 sngi naduh ka sngi ba ki rung hapoh ka Jylla. Lada ki lap ba ki don ia ki dak jong ka jingpang Covid kum ka khiehshoh, jyrhoh, sat ryngdang bad kiwei kila dei ban phah test mar mar sha ki jaka test ba la buh da ka Sorkar.