U Deputy Commissioner ka West Jaiñtia Hills District uba dei ruh u Chairman ka District Disaster Management Authority (DDMA) ula pynbna baroh ki jaka pule hapoh ka District kin khang khyrdep lashai ka sngi 25 tarik u Risaw, 2022 na ka daw ka jingbteng jong jingjur u slap bad ka jingbeh jong ka ‘erlangthari bala tip kyrteng kum ka Sitrang Cyclone.
Ïa kane u DC ula pyntip hadien ba ka ïoh ïa ka report na ka tnad India Meteorological Department (IMD) ba dei peit ïa ka jinglong jingman jong ka suiñ bneng, kane ka jingkhang ïa ki jaka pule ka long shi bynta ban lait na kino kino ki jingjia kiba sngewsih na ka jingwan lynshop ki bor mariang ïa ki khynnah skul bad ïa ki samla pule kumjuh.
Ha kawei pat ka khubor bala iohlum la iathuh ba i Deputy Commissioner & Chairperson DDMA jong ka East Khasi Hills ruh ila pynmih ia ka hukum ban phah khang khyrdep ia baroh ki skul, ki college bad baroh ki jaka pule lashai ka sngi na kane ka juh ka daw jong ka jingwan lynshop u slap bad ka ‘erlangthari.