U symbud myntri rangbah ka jylla Bah Prestone Tynsong ha ka 6 tarik Jymmang 2025 u la lum jingialang ia ki heh ophisar, ki BSF bad ki Deputy Commissioner ban iakren halor ka jingsahteng ka jingker sainar shiah ha ki shnong Khappud bad ka Bangladesh.
Haba kren sha ki lad pathai khubor na ka liang u symbud myntri rangbah u Bah Prestone Tynsong hadien ba la wai ka jingialang u la pyntip ba u la bthah ia ki Deputy Commissioner na East Jaintia, West Jaintia Hills bad na kiwei kiwei ki District ba kin leit jurip ia ki shnong kiba don ha ki thain khappud ki bym pat ker sainar shiah ba kin ia pynbeit bad ka jingthmu ba kongsan jong ka sorkar ka long ban pynurlong noh shen ia kane ka jingker sainar ha ki thaiñ khappud khnang ban tehlakam ia ka jingwan rung beaiñ ki nong Bangladesh.