U Dr. Mukul Sangma uba dei ruh u Nongïalam jong ka liang pyrshah, u la wanrah da ka jingkylli ha kaba iadei bad ka Tura Government Medical College kaba dei ruh ka Shlem hikai ba ki samla ki angnud ban ioh pule doktor ha la ka Jylla khlem da khmih lynti shuh na shabar jylla.
Kitei ki mat jingkylli ki long kumne, Kumno ka jinglong jingman jong ka Tura Government Medical College haduh kane ka tarik, katno ka jaka ba la ai ei da ki trai jaka na ka bynta katei ka Projek?, katno ka Sorkar India ka la mang na ka bynta ban tei ia kane ka Shlem pule.
Na ka liang ka Kong Mazel Ampareen Lyngdoh kaba dei ruh ka Myntri ba khmih ia ka tnad ka Koit ka Khiah jong ka Jylla ka la iathuh ba ka kam mynta ka la iaid haduh 75%. Ka la iathuh ruh ba 189 klur la mang ban pynlut na ka bynta kane ka Projek, 170.10 klur la bei da ka Sorkar India, bad 19 klur ba la bei da ka Sorkar Jylla bad ka Pisa ba la pyllait sha u kontraktor haduh kane ka sngi ka long 178.66 klur.
Hadien katei ka kaiphot ba la wanrah da ka Myntri, na ka liang u Dr. Mukul u la diaw khyndiat ba um ioh ia ka jubab kaba hun bad kaba tikna “Ka jingjubab kam long kaba shai, kane ka 75% ka dei na ka bynta kaei? Buh jingkylli u Mukul ia ka Kong Ampareen. Ka Myntri ka la iathuh ba kane ka 75 % ka dei ka jingtrei ne ka jingtei (construction).
Shuh shuh ka la iathuh ba haduh 420 jingthiah la buh ha kane ka Shlem, kata ha ki tnad bapher bapher kynthup ha ki jaka kha khyllung.
Namar ka jingbym hun katkum ka jingbuh jingkylli, u Sangma u la ong “Ki khun jong ngi ki kwah ban long doktor bad kane ka college ka donkam ban pyndep ha ka por, namar ka eh ia ki Kmie ki kpa ban pyndep ia ka jingangnud jong ki khun khlem ki shlem hikai ba paka, namar kata nga kwah ia ka jingpyntikna”.
“Ngi ruh ngi don ia kajuh ka jingsngewkhia” ong ka Kong Ampareen. ” Ngi la trei shitrhem na ka bynta ban pyndep ha ka por. Nga kwah ruh ban ai ka jingpyntikna ba ki jnit ki jnat ki bun bha na ka bynta ban pynurlong ia kane ka Projek, kumta ka jingjubab jong nga ka long, hooid ngin pyndep ha ka por” pynpaw ka Myntri.