Buh kyndon ka DS Tuber Kmaishnong na ka bynta ban ïalap election hapoh shnong ha kane ka MDC Election

Ka Dorbar Shnong Tuber Kmaishnong, East Jaiñtia Hills District lyngba u kyrwoh ba la phah da u Waheh Shnong, u bah Miki Lyngdoh la ong ba ka Executive Committee jong ka shnong ka la buh da ki kyndon na ka bynta ka jingwan ïalap election hapoh u pud u sam jong ka shnong Tuber Kmaishnong kaba na ka bynta kane ka MDC Election 2025.
Katkum ka Executive Committee shnong kaba la pynlong ha ka 27 tarik Kyllalyngkot 2025, ka Committee ka la rai da kawei ka sur na ka bynta ban tehlakam ïa ki kam sniew kiba bun rukom, kumta ka committee ka la buh da ki kyndon ki ban sa treikam tang hapoh shnong Tber Kmaishnong kata naduh ka 3 tarik rymphang haduh 21 tarik rymphang 2025.
Katkum ki kyndon la ong ba tang ki candidate bad uwei u nongbud jong u, uba lah ban wan rung ïing ban pynsngewthuh sha ki longïing kiba don hapoh shnong, ym bit ban wan ki briew ki bym ithuh ban wan rung ïing khlem ka jingtip ka Dorbar Shnong laitnoh ki briew ba la kdew haneng. Ha kaba ïadei bad ka jingwan ialap election, baroh ki candidate ki lah ban wan ban pynlong campaign tangba ki dei ban bud ïa ki kyndon ba la buh da ka shnong.
Katkum ki kyndon la bthah ba “Ki candiadte ki lah ban buh ïa ki tarik ha kano kano ka tarik, ka shnong kan ailad tang san tylli ki kali rit ban rung shapoh shnong ban pynlong ïa ka jingïalap election, ka shnong kan ailad san tang ngut ki briew ban pynsngewthuh kynthup bad u candidate, ym bit shuh ban wan paidbah nabar shnong ha ka por ialap election namar ka jingialap election ba pynlong kan long beit ka jingpynsngewthuh tang ïa ki nongshongshnong jong ngi, ym bit ban teh poster lane lama ha dorbar shnong community hall, kata lada pynlong hapoh community hall, ym bit ban pynlong khawai dawai hapoh ka community hall”
Ka Dorbar Shnong kam khanglad ïa ka jingwan pynsngewthuh jong baroh ki kyrtong ne ki candidate, hynrei khnang ban dup lah ban wanrah shongsuk shongsaiñ, ki bor pyniaid shnong ki kyrpad ïa baroh ban sngewbha ban bud ïa ki kyndon ba la kdew bad ruh kino kino ki party ki lah ban wan pynsngewthuh ne ialap election hynrei ym bit pat ban leh tam ïa ki kyndon.
“Ka Dorbar Shnong ka kyrmen skhem ba phin ai ka jingīatreilang na ka bynta ka jingbha hapoh ka shnong jong ngi bad ruh la buh ïa kitei ki kyndon khnang ruh ban dup lah ban pynneh pynsah ïa ka khuid ka suba hapoh ka shnong ka thaw bad ruh ba ka jingialap election kan long kaba ïaid beit ïaid ryntih ha suk ka saiñ, ngi khang ruh ban wan ialam ïa ki nongkyrshan kiba na bar shnong lait noh tang ïa ki trai shnong la shah ban don ha ki jingialang ialap election” pynkut u kyrwoh.