Ka Executive Committee jong ka shnong Thangraiñ mynta ka sngi kala pynmih ia ki kyndon kiba iadei bad ka jingwan ialap Elekshon jong ki kyrtong ki ban iakhun ia ka MLA 2023 sha poh ka shnong, ha kaba la bthah ia baroh ki kyrtong ba ki hap ban bud beit bud ryntih ia kine ki kyndon.
Ka shnong kala pyntip ba uno uno u kyrtong uba wan ialap elekshon hapoh ka shnong um lah ban wan ialam shibun tylli ki kali, hynrei la ai lad bad shah tang 4 tylli ki kali rit. Namar ka jingwan bun ki kali ka wanrah ki jingthut ha ka leit ka wan hapoh shnong poh thaw.
Ka shnong kala khang ruh ba yn ym shah ia kino kino ki kyrtong ne ki nongkyrshan jong ki ba kin wanrah ia kino kino ki jait jingdih pynbuaid, kum ka kyiad bad kiwei de.
Yn ym shah ruh ban sam pisa hapoh u pud u sam jong ka shnong. Lada lap ia kino kino kiba ialeh pyrshah yn pynshitom katkum ki kyndon aiñ.
La bthah ruh ba baroh ki jingialang ki ban sa pynlong hapoh ka shnong Thangraiñ ki dei ban bud ryntih ia ki kyndon jong ka Election Commission ka ri India bad ruh katkum ka shithi kaba la dep ban phah da u Deputy Commissioner sha baroh ki Waheh Shnong hapoh ka West Jaiñtia Hills District.
Na ka liang jong u Waheh Shnong ka Thangraiñ ma P. Sungoh, ula ong ba kane ka jingbuh kyndon ia ka rukom ialap elekshon, ka long ruh shi bynta ban bud beit bud ryntih ia ki jingbthah na ka Election Commission jong ka ri India, khnang ban ioh ia ka elekshon kaba khuid ba suba.