Ki nongialam ka Khasi Student Union Sengkmie bad ki dkhot ka North khasi Hills ki la buh kynsan ia ka ILP Check Gate mynta ka sngi ka 6 tarik Naitung 2024.
Kane ka khyrdop ka long ban talasi ia ki kot ki sla jong ki bar Jylla. Ka jingwan buh ka KSU ia ka ILP Check Gate ka dei namar ka jingbymshai ka Sorkar Jylla bad kumjuh ka Sorkar India ban pynioh ia ka Inner line Permit ia kaba ka Jylla ka lah dep mynjur ha iing Dorbar Thaw aiñ ha ki snem ba lah dep, bad ban dawa ruh ban pyntrei kam noh ia ka MRSSA.
Ia kane ka ILP Check Gate jong ka KSU la pynieng ha surok bah NH-6 hapoh Ri- Bhoi District ha ka shnong 20 mer Pahamawleiñ shwa ban poi ka Toll Gate NHAI.
Hadien ba la ioh jingtip ia kane ka jingleit buh ia ka ILP Check Gate jong ka KSU. Na ka liang ki Pulit bad ki bor pyniaid District ki la hiar sha katei ka jaka ban ia kren bad ban phah pynsangeh noh ia ka jingtalasi.