Khnang ban pynsuk ia ka khaiï pateng ki nongrep ha ki thaiñ nongkyndong, mynta ka kynti ka National Bank for Agricultural and Rural Development (NABARD), ryngkat ka jingiatreilang bad ka Jaintia Hills Development Society (JHDS), kila buh thong ban tei ia ka iew ha ka Shnong Namdong-B kaba hap hapoh ka West Jaiñtia Hills District ia kaba yn tip kum ka Rural Haat.
Khlem da pynslem shuh ban pyndep ia kane ka thong, ha ka 12th u Kyllalyngkot la buh ia u mawnongrim ban tei noh ia kane ka ïing da u Block Development Officer (BDO) ka Namdong C&RD Block u ma Heimonmi Niang, uba long u kongsan ha kane ka jingialang ryngkat ka jingiadonlang u bah Grevile Kharlukhi, Assistant General Manager ka NABARD, kum u Symbud kongsan.
Kiwei de kiba la iadonlang ha kane ka jingialang ki kynthup ia u Director ka JHDS u Fr. Manbha Pakem, u Coordinator ka JHDS u bah Denis Kurkalang, u Rangbah Shnong ka Namdong B u ma Damian S. War bad kiwei de ki riew Rangbah.
Ia kane ka ïing yn sa tei ha ka jaka kaba heh kumba 3000 sq meter ia kaba la ai sngewbha da ka Dorbar shnong bad ka jinglut ha ka ban tei ia kane ka ïing kan long 16,66,000/- tyngka.