U myntri ka tnad Tourism jong ka jylla u MLA ma Sniawbhalang Dhar ha ryngkat u myntri ka C&RD bah Hamlet Dohling bad u MLA 2-Jowai Constituency ma Wailadmiki Shylla, mynta ka sngi kila buh ïa u mawnongrim ban tei ïa ‘Hospitality Complex’ hajan jong ka pung Thadlaskeiñ ha ka jinglut kaba Rs.35 klur bad ban shan thymmai ïa ka ophis jong ka Thadlaskeiñ C&RD Block kaba kot T.3 klur tyngka.
Kiwei de kiba la wan ban ïadonlang ki kynthup ïa u Director of Tourism Department bah C.V Diengdoh, IAS, Director ka C&RD Department u S.C. Sadhu, IAS, u Deputy Commissioner ka West Jaiñtia Hills bah. B.S. Sohliya, IAS, ki ophisar sorkar nalor kiwei de kiba la shah khot sngewbha.
U myntri ka Tourism ma Sniawbhalang Dhar ha ka jingkren ula ong ba ka jingtei ïa kane ka ‘Hospitality Complex’ kan ïarap shibun eh ban pynïoh kam ïa ki khun samla bad ha ka juh ka por kan ïarap ban pynkiew shuh shuh ïa ka kam jngohkai hapoh ka District, kan jingdon kum kane ka jaka kan ïarap shibun eh ïa ki jingdonkam jong ki nongwan shangkai pyrthei.
Ula pynsngew ba kane ka ‘Hospitality Complex’ kan ïarap ban ai kam ai jam ïa ki khun samla kaba lah ban kot sha haduh 200 ne 250 ngut eiei kiba kynthup naduh ka kam pynkheh ïa ki kamra thiah, ka jingpynbiang ïa ka bam, ban ïalam lynti ïa ki nongwan kai, ki jaka pynlong jingïalang bad kiwei kiwei de nalor kine kin don sha ki jaka ban ïalehkai ki khynnah ‘Children’s Park’. Ula pyntip ba kane ka projek la bei pisa hapoh ka lyngba ka State Planning jong ka sorkar jylla.
Na ka liang u myntri ka C&RD bah Hamlet Dohling, ula ong ka jingplie ïa une u mawnongrim na ka bynta ban shna pynbha ïa ka ophis thymmai ka Thadlaskeiñ C&RD Block kala urlong, dei lyngba ka jingtreishitom jong u MLA ka thaiñ u ma Wailadmiki Shylla uba la angnud ban pynkiew ïa ka roi ka par hapoh ka Constituency. Ula pyntip ba kane ka ophis jong ka Block kan long ruh kum ka jingkieng kaba lah ban pynïasoh ïa ka rukom treikam jong ka sorkar bad ki paidbah nongshong shnong.
‘Ka long kaba sngewtynnad ban ïoh jingtip na ki paidbah ba ka rukom ai jingshakri jong ki ophisar na ki Block bad ki nongtrei ka long kaba kaba biang eh haduh katta katta’ ong u bah Dohling, kumta ula ai ka jingïaroh ba ka jingbuh ïa une u mawnongrim kan ïarap khambha ban pynïaid beit pynïaid ryntih ïa ki skim sorkar ha ka lynti kaba dei sha baroh ki paidbah jong ki shnong bapher bapher.
Shuh shuh ula ong ba ka sorkar kala dep ban pyllait ïa ka pisa kaba 120 klur na ka bynta ban pynbha pynmiat ïa ki 46 tylli ki Blocks ha ka jinglut kaba 3 klur manla kawei ka Block.
