40 hajar tylli ki SHG kila ioh jingiarap pisa ba la kot T.220 klur tyngka : CM –
Mynta ka sngi u Chief Minister ka jylla u Conrad K Sangma ula leit ban buh ia u mawnongrim na ka bynta ban sdang tei noh ia ka ophis jong ka Rerapara C& RD Block kaba don ha South West Garo Hills bad ula leit ruh ban plie ia ka SHG Mela ha ka jingiadonlang u MLA ka North Tura u Thomas A Sangma, u MDC ka Boldamgre u Stevie Marak bad ki ophis jong ka District.
U Chief Minister haba kren ha ka jingialang paidbah ula pyntip ba ka jingtei ia kane ka ophis treikam jong ka Rerapara C&RD Block kala kot sha ka T.2.25 klur tyngka. Ka jingthmu jong ka sorkar ban pynmih ia ki Block ha ki thaiñ nyngkyndong ka long ban wanrah ka jingiajan jong ka sorkar bad ki nongshong shnong bad ruh kan wanrah ka jingmyntoi ia ki nongshong shnong. Kumta u la kyntu ia u BDO bad ruh ia u Contract ba ki dei ban trei pynkloi ia ka kam bad ban pyndep tei ia kane ka ophis hapoh ki por ba la buh, khnang ba kan ai ka jingmyntoi ia ki nongshong shnong ka thaiñ.
U Sangma ula pynkynmaw ba bun na ki Block hapoh ka jylla ki trei kam ha ki ïing shongwai, namar ba kim don ia ki ophis treikam lajong. Kumta ula ong ba ka sorkar kala dep ban mang haduh T.120 klur tyngka na ka bynta ban shna ia ki ophis thymmai ia ki 46 tylli ki Block ophis hapoh ka jylla. Ka jingkhot trei ia kiwei pat ki ophis Block yn sa pynmih ha kine ki khyndiat sngi jong u bnai March-April. Ula ong ruh ba ka sorkar ka dang shong pyrkhat mynta ban pynmih ia ki Block bad ki Civil Sub-Division ha ki thaiñ bapher bapher ka jylla.
U CM haba ai jingkren ha ka jingialang jong ki Self Help Group (SHG), ula ong ba ka sorkar jong u ka ialeh ban pynleit jingmut na ka bynta ka ioh ka kot jong ki nongshong shnong naduh ki longkmie bad ki samla da kaba ai jingiarap lyngba ki skhim bapher bapher. Ula ong ruh ka sorkar ka ialeh ban kyntiew ia ki nongrep ka jylla lyngba ki Self Help Group (SHG) bad kawei na kine ki prokram ka dei ka National Rural Livelihood Mission (NRLM) nalor kiwei de kiba kynthup ia ka Start Up Funds, Revolving Fund, Community Management Fund bad lyngba ki Bank ha ka dur jong ki Loans.
U CM ula pyntip paidbah ruh ba haduh mynta ka sorkar kala lah ban pynioh jingiarap haduh T.220 klur tyngka sha ki 40,000 tylli ki SHG kiba don ia ki dkhot ym duna ia ka 4 lak ngut ha baroh kawei ka jylla.
Ha kane ka prokram u CM ula ioh ban ai jingiarap pisa sha ki 12 tylli ki Village Organisation hapoh ka Rerapara C&RD Block kaba kot sha ka T.1.30 klur bad sa T.50 lak tyngka na ka Meghalaya Rural Bank Loan ka bym donkam ban siew sut.
U Conrad ula ioh la batai lyngkot ruh ia ka jingtreikam jong ka skhim FOCUS kaba dei ka lad ban kyntiew ia ki nongrep jong ka jylla ha ki liang bapher bapher kum ha ka jingring sniang, ka jingpynmih ia jingbam na ka dud, ki kam ri syiar, ri dohkha bad kiwei ha kaba u la kyntu ia ki nongshong shnong ban shim ia kane ka kabu da kaba seng ia ki Co-operative Society.