U Addl. District Magistrate, ka East Jaintia Hills District, Khliehriat ha ka jingpyllait khubor ba la pynmih ha ka 18 tarik mynta u bnai la pyntip ban yn shah tang ia ki kali rit kiba kynthup ia ki Jeep, ki Maruti Car, ki Van ba kin iaid lyngba ia ka jingkieng ha Sonapur kaba don ha ka Km ba 140+200 katba ka jingmaramot ia kane ka jingkieng ka dang iaid shakhmat.
Kine ki kali rit ki lah ban iaid lyngba ia ka jingkieng tang ha kine ki sngi ne tarik bala ai bor ia ki, kata ha ka 19, 20, 21, 22, 25, 26, 27 bad 28 mynta u bnai. La shah ban iaid lyngba tang 3 (Lai) tylli ki kali rit ha ka juh ka por katba kane ka jingmaramot ka dang iaid.