U Symbud Myntri Rangbah ka sorkar jylla u ba dei ruh u Myntri ba khmih ia ka Tnad urban Affairs, u Bah Sniawbhalang Dhar, u la iathuh ba shen ka Tnad kan sa lum da ka jingialang bad ki bor District ha ryngkat ki BDO jong ki Block ban iakren halor ka jingshna ia jaka theh ñiut hala ki jong ki shnong ki thaw.
Haba kren sha ki ladpathai khubor ha ka 10 Tarik Nailur 2024, ha nongbah Shillong, u Bah Sniawbhalang Dhar u la ong ba ha kaba ba iadei bad ki jaka theh ñiut, na ka liang ka Sorkar ka don ia ka jingai jingmut ban kyntu ia ki shnong ki thaw ban shna da ki jaka theh ñiut hala hala ki shnong, kumta ka Tnad shen kan sa shong jingialang ban iakren halor kane ka mat.
U Bah Sniawbhalang u la ong “Ka jingwad ia ka jaka theh ñiut ka dang iaid shakhmat bad mynta ka taiew hi ngin sa pynlong da ka jingialang ban iakren halor kane ka mat “.
U la bynrap ruh ba halor ka jaka theh ñiut ba thymmai, ka Tnad ka don ka jingthmu ba shna da ka ba lah ban neh haduh 50 snem bad kan ym long kum ka Marten da kaba kdew ba ka jaka theh ñiut kaba thymmai ka sorkar kan pyntrei kam kat kum ka juk mynta, ka bym dei ban shu theh beit ia ki niut kum ba long ki jaka theh niut ha ki por mynshwa bad kan ym ktah ia ka mariang lane ia ki jaka ba marjan .
“Na ka liang ki bor District bad ki Block, ngin sa iakren ia baroh ki Rangbah Shnong ban kyntu ban shna hi noh ia la ki jong ki jaka theh ñiut ha la ki shnong bad shen ngin sa pynlong da ka jingialang ban iakren halor kane ka mat ” u la ong shuh shuh.