Shim bynta lang ki longkmie na ka shnong Sohmynting
Ka ophis u Deputy Commissioner ha ryngkat ka jingtreilang bad ka ophis u District Sports Officer, West Jaiñtia Hills mynta ka sngi 31 u Risaw, 2024 kila pynlong ïa ka jingmareh bala tip kum ka “Fit India Freedom Run 5.0 and National Unity Day Run”, ïa kaba la kaweh lama da u EMH Passah, Working President, WJDSA.
La pynlong ïa kane ka jingïakop shi bynta na ka thong jong ka Rashtriya Ekta Diwas kum ka dak ban pynsngew sha ki paidbah nongshong shnong shaphang ka nongrim jong ka jingïatylli bad ka dak kynmaw burom ïa ka lyngkhuh sngikha u Sardar Vallabhai Patel u riew khraw pyrkhat bad u nongsaiñdur ïa ka ri India kaba thymmai hadien ka jingshah shynshar haka sorkar phareng.
Ha une u snem kila don shibun ki nongwan ïashim bynta bad kaba itynnad shuh shuh wat ki longkmie naka shnong Sohmynting kila wan ban ïa mareh lang.
La sdang ïa ka jingmareh na madan Kiang Nangbah Stadium bad ïaid lyngba ka Ladthadlaboh, Memory Colony, Salaroh, Dulong Pohali, Pamhadem, Panaliar Civil Hospital Loomïongkjam, Iongpiah, Mission Compound, Chutwakhut, Iawmusiang, Loom Soo Iung Newhill, Ladthadlaboh bad pynkut ha WJDSA Indoor Stadium.
Ïa ka nam ha ka jingïakop phet Fit India Freedom Run 5.0 and National Unity Day Run 2024 ha ka liang ki shynrang la ïoh da u Dabit Dhar na Sabahmuswang uwa da pyndep hapoh 31 minit 52 sekhon, bud da u Dasaman Kyndait uba pyndep hapoh 32 minit 3 sekhon bad u Daioohimitre Suting uba pyndep hapoh 32 minit 17 sekhon.
Katba ha ka liang ki kynthei la jop da ka Lamsuk Phawa kaba pyndep hapoh 44 minit 58 sekhon bud sa ka Marwa Shylla kaba pyndep hapoh 45 minit 20 sekhon bad ka Himonki Khaii kaba pyndep hapoh 45 minit 39 sekhon.
Ïa ki khusnam da ki Memento ryngkat bad ka song pisa la sam sha ki nongjop da u EMH Passah, Working President WJDSA bad u Patrick Lamare, Vice-President, West Jaiñtia District Sports Association.
