Ka seng hapoh ka lama “Jaiñtia Joint Alliance” (JJA) ba kynthup ïaka Warjaiñtia Students’ Union (WjSU) bad ka Jaiñtia Youth Federation (JYF) hynnin ka sngi 11 tarik u Jylliew kala phah da ka jingthoh sha ka myntri ka tnad ka koit ka khiah jong ka sorkar jylla ka Dr. M Ampareen Lyngdoh lyngba ka ophis u Deputy Commissioner West Jaiñtia Hills District Jowai ban dawa jur ïa baroh ki doktor sorkar ban wan trei katkum ka por bala buh bad ban pynpoi biang por ïa ki dawai sa ki jaka sumar sorkar.
Katkum katei ka shithi ka “Jaiñtia Joint Alliance” kala pynsngew halor ka jingbym shimkhia jong ki doktor sorkar ban wan trei katkum ka por bala bthah ha ki jaka sumar naduh ki Dispensary, PHC, CHC bad Civil Hospital kiba doh hapoh ka Ri-Lum Jaiñtia. Da kaba kdew bunsien ki doctor sorkar kim juh shimkhia satia ïa ka kam bad kane ka jingleh jong ki ka ktah ïa ka rukom ai jingsumar sha ki paidbah khamtam eh ïa ki briew kiba duk bad ki nongkyndong, la kynnon ka seng.
Kumta la kyrpad na ka tnad ka koit ka khiah ba kin pyrkhing bha ïa ka jingbud por bad ka rukom wantrei jong baroh ki doktor sorkar. Ka seng kala kren shai lada ki dang lap ïa kum kane ka jingleh bymman wat hadien ba la dep ban aiti ïa kane ka jingthoh, na ka liang ka seng kan hap ban shim ïa ki sien jam kiba tyngeh.
Ka mat ba ar hadien bala ïoh shibun ki jingujor na ki paidbah halor ka jingbym biang ka rukom pynpoi ïa ki dawai dashin ha ki jaka sumar sorkar kaba ktah ïa kiba bun ba lang, kumta ka seng kala dawa na ka tnad ka koit ka khiah jong ka sorkar jylla ba kan pynthikna ba ka rukom pynpoi ïa ki dawai bad ki tiar donkam kan long haka por kaba biang.
Na ka liang ka “Jaiñtia Joint Alliance” hadien kane ka jingujor lyngba ka jingthoh kala ai por hapoh shibnai ban pyntreikam ïa kine ki mat jingdawa. Ha ka juh ka por ka khmih lynti ba ka sorkar kan shimkhia mardor ïa kine ki mat jingdawa khnang ban suk ki paidbah kiba donkam jingsumar na ki jaka sumar jong ka sorkar.