3 sngi lynter ka jingjur slap ha Sor Shillong kaba la pynlong ruh ia ka jingshlei ki surok, ka jingtwa ki khyndew bad ka jingduh bylla jong briew kiba im jakpoh da kaba shong dukan ha ki rud surok bad ki dukan rit kiba don shi lynter ka Nongbah kaba dei na ka daw bym biang ki nala um kiba heh bad ka jingbym lah ban teh lakam ia ka jingbret ñiut pathar kaba la wanrah ka jingsahkut ia ki nur rit bad ki lynti um kiba tuid sha ki lynti um kiba la shna kyrpang.
Ka dong Polo, Langkyrding, Nongmynsong bad katto katne ki dong ha Mawlai ki la mad biang ia ka jingeh kumba ju long man u snem namar ka jingjur u slap kaba la pynlong ban dap um bad duh ruh ka leit ka wan ha kaba wat ki kali kim ioh shuh ban iaid namar ka jingtap ka um ia ki surok bad ki lynti rit. Kawei na ki jaka ba ka um ka la shong Nongrim ka dei ha Nongmynsong ha kaba la sakhi ba bun ki ïing kiba don ha kitei ki them ki la dap um haduh ïing kynthup ruh ia ka skul Bah BDW International school, Nongmynsong.
Kaba ktah eh na kane ka jingshlei ki surok ka dei ia ki khynnah skul bad khamtam ia ki nongbylla sngi kiba trei ia ki kam bapher bapher khamtam ia kito kiba die jingdie ha ki rud surok.
Ha kaba iadei bad kane ka jingeh, bun ki paidbah ki la buh jingkylli ia ki bor ba dei khmih ba kumno kim lah ban thawlad bad pynkhreh lypa haba kane kam dei ka sien ba nyngkong, hynrei ka jingdap um ha kitei ki jaka ka dei kaba la ju jia man u snem. Ki paidbah ki buh ruh ka jingkylli hato ym lah mo ban pynbiang ia ki nala heh kumba leh ha kiwei ki Jylla khamtam ba ka jylla jong ngi ka dei ka jaka Ri-lum.