Na ka liang ki nongialam ka Wapung Circle ba la lam khmat da u President Shaniahskhem Dkhar, u Deiniwan Lyngdoh President KSU Wapung unit, u Hamewanpynhun Ryngkhlem Organising Secretary bad ki dkhot, ha kine ki kyndiat sngi ki la leit ban jurip ia PHC Pamra hadien ba la ioh ka jingujor na ki paidbah ka thaiñ, ki ba wan ban ioh ka jingsumar na kane ka PHC.
Ki paidbah ki la ong ba naduh ka 5 tarik u Bnai Rymphang ym don Doctor ba wan trei, ki staff ruh ki duna ba wan trei. Ka seng ka la leit wad jingpynshai na u DMHO ka District ha ka 16 tarik bnai Rymphang. Na ka liang u DMHO u la ong ba jingbym don Doctor ka dei ba ki shim shuti, kawei ka shim maternity leave bad uwei u Doctor u shim shuti ba iathoh.
Ka seng ka la kylli balei ka ophis DMHO ka khlem phah Doctor ban wan trei ha ka jaka kine ar ngut ba shim shuti. Na ka liang u DMHO u la ong ba duna Doctor hapoh ka District na kata daw ki khlem ioh phah. Ka seng ka la kyntu ia u DMHO ba dei ban phah Doctor ban wan trei ha kane ka PHC khnang ban lait na ki jingeh ia ki paidbah lane ban lait na ki jingjia ba sngewsih ia ki paidbah khamtam ia ki kynthei ba wan ha ka por ba armet.
