-Kyntu u Waheh Shnong ïa ka sorkar ban ïarap kloi ban lait na ki jingjia ba sngewsih-
Ka jingjur jong u slap ha kine ki khyndiat sngi khamtam ha ka 14 bad 15 tarik mynta u bnai kala wanrah ka jingshlei um kaba jur ha ki bynta jong ka shnong Huroi, kaba don ha East Jaiñtia Hills District, ka shnong kaba don sha ki bynta khappud bad ka ri Bangladesh.
Haba kren sha ki lad pathai khubor u Waheh Shnong jong ka shnong Huroi u bah Golden Marbaniang, ula ong ba kane ka jingjia shlei um ka jia na ka daw bym don ka kynroh kaba skhem ha ki bynta jong ka wah Huroi kaba tuid naruh jong ka shnong. Kumta ka umsaw kala ïoh lad ban kyntur sha ki bynta jong ka shnong kaba la wanrah ïa ka jingshlei um na ka por sha ka por, shisien ba la poi ka aiom slap.
Ha kane ka jingjia ki nongshong shnong kiba don ha kitei ki bynta ba jia ka jingshlei um, kila hap ban phet rieh bad kynriah jaka noh sha kiwei pat ki bynta ba kham shngaiñ jong ka shnong. Katba kila hap ban iehnoh shadien ïa la ki jingri jingdup bad ki jingthung jingtep, kiba la shah rong noh ha ka umsaw, bad kane kala wanrah ka jingduhnong kaba khraw ïa ki.
Kumta ha kaba ïadei bad kane ka jingjia na ka liang u bah Golden ula buh ka jingpynkynmaw ïa u Deputy Commissioner jong ka East Jaiñtia Hills District ba un sngewbha ban shimkhia ban pynshna noh ïa ka kynroh kaba kila dep ban dawa naduh mynshem snem (27/4/2023), khnang ba ka shnong kan lait na kane ka jingsleium ba khah khah.
Ha kajuh ka por u bah Golden ula kyntu ruh ïa ka MLA jong ka thaiñ ka kong Santa Mary Shylla bad ki bor ba dei peit ïa ki jinglynshop mariang ba kin ïarap kloi ban leh ïa kaba donkam, khnang ba kan ym jia kano kano ka jingjia ba sngewsih ïa ki nongshong shnong jong ka shnong Huroi.
Khadduh eh u Waheh Shnong bah Golden Marbaniang ula kyntu jur ïa ka sorkar ba kan ïarap kloi katba lah ban ai ka lad jingïada ba pura ïa ki nongshong shnong ka Huroi, kumba kala ju ai ki jingïarap kiba na ka por sha ka por, khnang ba ki nongshong shnong kin ym mad ïa ki jingjia ba sngewsih.
Ha kawei pat ka khubor la ïoh jingtip ba kiwei pat ki shong kiba don marjan bad ka shnong Huroi kiba don ha khappud Bangladesh kiba kynthup ïa ka Hingaria bad Borghat, kine ki shnong ruh kila mad ïa ka jingeh kaba khraw ha ka leit ka wan na ka daw jong ka jingtwa kyndew kaba jur kaba la tap bad pynsahkut ïa ki lynti syngkieng.
Nalor kata kala don ruh ka jingshahtap khyndew jong ki ar tylli ki ïing kaba la jia ha ka 14 tarik mynta u bnai ha ka shnong Hingaria.
Kumta na ka liang kine ki shnong ruh ki buh ka jingkyrpad ïa ka sorkar ba kan phah ki lad jingïarap ban pyllait ïa ki na kine ki jingeh ba ki ïakynduh.